Тывада Крещение байырлалынга сугже кирип, айыс алыр ёзулалга белеткел доозулган

Православ шажын чүдүлгелиглерниң Крещение хүнүнде ыдыктаан сугга калбаа-биле сугга кирип, айыс алыры - чугула байырлалдарның бирээзи. Сөөлгү чылдарда коронавирус кызыгаарлаашкыннарындан республикага Крещениеде сугга массалыы-биле кирер ёзулал болбайн турганын сагындыраал. Ам бо чылын ук байырлалда хөй чүдүкчүлер келири чадапчок.
Январь 18 дүнезинде, баш бурунгаар белеткээн купельге суг ыдыктаар езулалды эрттирер. Кызыл хоорайда Вавилин ээтпээниң 5-ки база 6-гы километрлер аразында участокта сугда дошту оюп, тускай черни баш бурунгаар кылган. Айыыл чок чорук дүрүмнеринге дүүштүр доштуң кылыны 25 см-ден бичелевес ужурлуг. Россияның ОБЯ Тывада кол эргелелиниң биче хемчээлдиг суднолар талазы-биле күрүне инспекциязы төптүң начальнигиниң орлакчызы Аяс Ойдовтуң чугаазы-биле алырга, хемниң дожун специалистер хемчээген, Вавилин ээтпээнде шилиттинген участокта доштуң кылынын 90 см чедип турар, ынчангаш кижилерге айыыл чок.
Ужур-дүрүм эдерип, сугже киреринге эптиг кылдыр, чаданы туткан. Тыва Республиканың Чуртталга-коммунал ажыл-агыйы база Одалга болгаш энергетика яамыларының специалистери ёзулал эртер черниң чырык-биле хандырылгазын организастаар. Январь 18-тен 19 дүнезинде сугже кирип, айыс ап келгеннерниң айыыл чок чоруун хандырар дээш, дүрген дуза эмчилери, өрт-камгалал база хөй-ниити чурумун камгалаар ажылдакчылар, ТР-ниң Баштыныңы Администрация болгаш ТР-ниң Чазак Аппарадының харыысалгалыг специалистери дежурныйлаар.
Доштуг сугже кирери чүгле шуут кадык кижилерге ажыктыг болгаш кадыынга айыыл чок дээрзин эмчилер сагындырып тур. Бистиң ышкаш соок агаар-бойдус кижиниң мага-бодунга улуг стрессти болдурар болганда, ол ёзулалга чоорту белеткенгени дээре. Бичии уруглар, улгады берген кижилер, иштиг херээженнер, чүрек-дамыр база бестер системазы, тынар органнар, бүүректер, чүстер база хан базыышкыны аарыг кижилерниң сугже кирери күзенчиг эвес. Грипп, ОРВИ база Сovid-19-туң бичии-даа им-демдектери бар кижилерниң ынаар семээн ажыы чок – доштуг сугже киргеш, дегдирип болур. Оон аңгыда эзирик кижилерниң эштирин шуут хоруур. Соок сугже кирип, айыс алган соонда, изиг суксун аймаан ижер.
Январь 18-тен 19 дүнезинде Кызылда Воскресенск кафедралдыг хүрээге база Ыдыктыг Троицк хүрээзинге Бурганга улуг номнал өргүлүнүң соонда, сугну ыдыктап, айызаар. Шак-ла ындыг ёзулалдар Туранда ыдыктыг Владимир, Бүрен-Бай-Хаакта Николь, Сарыг-Септе Казань хүрээлеринге, Тоора-Хем суурда хемге болур.