Тывага «Блокада хлеви» деп сактыышкын акциязы эгелээр

2023 чылдың январь 18-тен эгелеп, республикада «Блокада хлеви» деп бүгү-российжи сактыышкын акциязы эгелээр. Акция дайзын эжелекчилерниң миллион дугаар хоорайының туруп көрбээн бүзээлээшкинин чурттап эрткен Ленинградтың чурттакчыларының эрес-дидим чоруунуң дугайында сагындырары-биле кыйгырган.
Ленинградтың бүзээлээшкини 872 хүн үргүлчүлээн. Бо анаа эвес сан – бүзээлеттиргеннерниң амыдыралында хүн бүрү берге шенелде болган. Аңгы-аңгы санаашкыннар-биле, хоорайга 692 муңдан 1,5 миллион чедир кижи өлген – оларның 97 хуузу аштан өлген. Эртенги хүнче чаңгыс-ла идегел паек турган. 125 грамм борбак хлеб – бүзээлеттирген Ленинградтың чурттакчыларынга хлеб үлеп бээриниң эң-не эвээш үлүү шак-ла ол хире кезек апарган.
Акцияның киржикчилери республиканың чурттакчыларынга болгаш аалчыларынга акцияның демдээ апарган 125 грамм хлеб кескиндизин үлээр.
Ленинградтың бүзээлээшкини чүгле фоточуруктарда артып каан эвес, дайын дугайында төөгү номнарында болгаш школа номнарында, ленинградчыларның сактыышкыны кылдыр артып калган: оларның хөй кезии шак ол бүзээлээшкинниң хлеб кезээн коргунчуг хүннер дугайында сактыышкын кылдыр арттырып алганнар. Школачылар болгаш студентилерге «Жизнь, опаленная блокадой» деп чырыдыышкын фильмин көөрүн сүмелеп турар.
Фильмни дараазында айтылгадан көрүп болур: https://vk.com/wall-85378843_6778
Акцияның хештеги #БлокадныйХлебТыва17