Тывада 654 өг-бүле чаңгыс аай пособиени алган

Январь 13-те, республикада ажы-төлдүг өг-бүлелерчаңгыс аай пособиезин бир дугаар алган. Россияның Социал фондузунуң Тыва Республикада салбыры 964 ажы-төлдүг 654 өг-бүле деткимче хемчээн алганын дыңнаткан. Регион чурттакчыларының кииргени 2000 хире билдириишкининге чаңгыс аай пособиени бээр дугайында шиитпир хүлээп алдынган. Доктааттынган чурум езугаар, төлевирни беш ажыл хонуунуң дургузунда шилчидер.
Бөгүнде фондуда ажы-төлдүг 7227 өг-бүледен 8 муң хире билдириишкиннер кирген, оларны сайгарып көрүп турарын салбырның удуртукчузу Светлана Кенден дыңнаткан. Киирген билдириишкиннерни сайгарып көөрге, оларның хөй кезиин электроннуг хевирге долдурган болуп турар. Чүгле сес кижи саазынга билдириишкинни бижээш, чон хүлээп алыр офис таварыштыр боттары дужааган.
Кызыл хоорайда дараазында: Красноармейская кудумчузу, б.146, Кочетов кудумчузу, 104а база Кочетов кудумчузу, 17. адрестерде үш клинт офизи хамаатылардан документилерни хүлээп турарын Светлана Кенден дыңнаткан. Республиканың шупту кожууннарында салбырның клиент офистери ажылдап турар.
Тываның Баштыңының ажык дөстерге (соцчеткилер, мессенджлер) чурттакчы чонга калбаа-биле дыңнадырын база хамаатыларның дыңнадыгларынга дүрген харыылаарын чедип алыр дээн сүмези-биле, Регион эргелеп-башкарылга төвү-биле Салбырның удуртулгазы кады, хамаатылар билдириишкиннерин ажылдаар «Инцидент-менеджмент» федералдыг системага специалистерни кожар арганы ажылдап турар.
Баш бурунгаар санаашкыннар-биле алырга, Тывада 88 муң ажыг ажы-төлдүг 60 муң ажыг өг-бүле чаңгыс аай пособие дээш билдириишкиннерни киирер ужурлуг.
Хөй эвес орулгалыг өг-бүлелерни деткээн беш амгы төлевирлерни чаңгыс аай пособие солуурун сагындыраал.