Тываның оруктарында, дыңзыг сооктар үезинде, чолаачылар чылыгар база дуза чедирер пунктулар ажылдап турар

Тывада 48 градус чедир дыңзыдыр сооп эгелээни-биле, республиканың Орук-транспорт яамызы база орук албаны федералдыг база регион чергелиг автооруктарда чолаачылар база пассажирлер чылыгар кылдыр хондур ажылдаар пунктуларны январь 12-ден эгелеп организастаан.
Абакан – Ак-Довурак автооруктуң 316-гы километринде (8-983-376-5055), Хандагайты – Мугур-Аксы автооруктуң 40-ки километринде (8-983-593-3198), на 45 км Хандагайты – Ак-Чыраа автооруктуң 45-ки километринде (8-983-593-3198), Бояровка – Тоора-Хем автооруктуң 104-ки кирлометринде (8-929-315-5688) стационарлыг чылынар пунктулар ажылдап турарын яамы дыңнаткан. Ол оруктарны ажаап-карактаарын харыылаан орук-тудуг участоктарының начальниктери таварыштыр олар-биле харылзажып болур.
Оруктарда стационар пунктуларга немей, берге байдалга таварышкан чолаачыларга база пассажирлерге дуза көргүзер болгаш патрульдаар машиналарны көжүп чоруур чылынар черлер кылдыр тургускан. Ында чылыг хепти, чоорганнарны, кидис идиктерни, аптечкаларны, изиг шайлыг термостарны, трос, хүүрек, горелка, фонарь дээн ышкаш херекселдерни база кывар-чаар чүүлдү курлавырлаан. Көжүп чоруур пунктулар ийи шак болгаш-ла, быжыглаттынган орук участоктарын хайгаарап турар.
Республиканың эң берге оруктарында көжүп чоруур чылыгар пунктуларны Цаган-Тологой – Качык база Бүрен-Аксы - Элегес-Аксы – Кунгуртуг авто-казанактарында организастаан.
Берге байдалга таварышкан чолаачылар «Тываавтоорук» компанияның 8-394-223-22-62, 8-929-358-09-11 дугаарлыг телефоннарында диспетчер-биле харылзажып болур. Р-257 федералдыг орукта дежурный 8-923-355-09-73 дугаар-биле дыңнадыгларны хүлээп турар. 112 дүрген дуза шугуму база кезээде харылзаада.
Моң мурнунда, Тываның Баштыңы Владислав Ховалыг сооктарның күштелип эгелээри-биле, амыдырал-хандырылганың шупту бүдүрүлгелеринге болгаш организацияларынга, ол ышкаш орук албан черлеринге, көрдүнмээн байдалдарны дүрген чайладырынга белен болур даалгаларны берген турганын сагындыраал.