«Енисей Сибириниң лидерлери» конкурстуң тиилекчилер санында Тываның 17 чурттакчызы бар

«Енисей Сибириниң лидерлери» регионнар аразында конкурстуң түңнелдерин үндүрген. Тиилекчи болган 97 конкурсантының аразында Тыва Республиканың 17 чурттакчызы бар.
Конкурстуң тиилекчилеринге «Енисей Сибири» комплекстиг инвестиция төлевилелиниң киржикчи организацияларында хостуг албан-дужаалдарны сүмелээн. Тиилекчилерниң даңзызын ensib.ru. сайтыда парлаан.
Красноярск, Кызыл, Норильск, Чебоксар, Санкт-Петербург, Москва болгаш өске-даа хоорайлардан 18-тен 49 хар чедир назылыг шупту 813 кижи конкурска киришкен. Конкурс киржикчилери «төлевилелдер удуртулгазы», «чурагай арга-мергежилдери», «харыысалга», «аай-баштыг боданыышкын» угланыышкыннарга тестилерни эрткен. Ооң түңнелери-биле, чогуур ужурлуг эң хөй сан алган киржикчилер тиилекчилер санынче кирген.
2022 чылдың ноябрь 15-тен декабрь 15-ке чедир, «Енисей Сибириниң лидерлери» регионнар аразының конкурузу онлайн хевирге эрткенин сагындыраал. Красноярск крайда, Хакас Республикада база Тыва Республикада улуг инвестиция төлевилелдеринге ажылдаар күзелдиг Россия Федерациязының хамаатыларын конкурска киржир кылдыр чалаан турган.