Тывада «Күзелдер Шивизи» 121 күзелди боттандырар

Байырлал хүннеринде «Күзелдер Шивизи» бүгү-российжи акция-биле Тывада 121 күзелди шилип тырткан. Чылдың-на Чаа чыл бүдүүзүнде, чуртта өскүс, амыдыралдың берге байдалында таварышкан азы хайгаарал чок арткан уругларга, кадыкшылы кызыгаарлыг 60 хардан өрү назылыг улгады берген кижилерге ачы-буянның улуг кампаниязы чоруп турарын сагындыраал. 2022 чылда акцияда мобилизастаттынган хамаатыларның өг-бүлелери база ажы-төлү, Россияның чаа регионнарында чурттап турарлар киржип эгелээн.
Бо чылын күүсекчи эрге-чагырганың федералдыг болгаш регион органнарындан Соок-Ирейлер база Тыва Республиканың Дээди Хуралының депутаттар корпузу 121 күзелдиң 69-зун күүсеткенин, республикада акцияны харыылап турар ТР-ниң Аныяктар херектериниң талазы-биле агентилел дыңнаткан. Бо чылын Федералдыг айыыл чок албанының ТР-де эргелелиниң ажылдакчылары ачы-буян кампаниязында бир дугаар киришкен.
Регионнуң Баштыңы Владислав Ховалыг 2022 чылдың декабрь 28-те, Тываның девискээринде акцияны албан езузу-биле ажыдып, Чаа чылдың Шивизинде 11 харлыг Субудай Санчайның Москваны көрүксээн күзелин тырткан турган. Бичии оолдуң күзели бүдүп, авазы-биле чурттуң найысылалынга Чаа чылдаан. Владислав Ховалыг ийи чаштың Чаа чылда илбичизи болганын сагындыраал. Ол Донецк Улус Республикадан 3 харлыг Елизаветаның уруглар ойнаар ноутбуктуг болур база 4 харлыг Эртине Колдуң электромобиль күзээн бодалын боттандырган.
8 харлыг Челээш Ооржактың планшет күзээн күзели декабрь 30-де бүткен. Тыва Республиканың Чазааның даргазының оралакчызы албан-дужаалды күүседип турар Айдын Чюдюк ооң Соок-Ирейи болган.
Тывада уругнуң эргелерин камгалаар төлээ Сайзана Товуу 15 харлыг Чойгана Сандыктың ноутбук күзээн күзелин боттандырып, декабрь 29-та Чаа чыл-биле байырын чедирген.
Тывадан 32 бичии уругларның күзели ачы-буян кампаниязының эгезинде-ле, Чаа чыл бүдүүзүнде боттанган болза, ам арткан 89 күзелди февраль 20-ге чедир бүдүрер деп, агентилел дыңнаткан. Республиканың муниципалдыг тургузуглары акцияга каттыжып, тус черлерниң “Күзелдер Шивизи”-биле 54 күзелди хандырган.
2021 чылда акция үезинде, Тывадан 211 кижиниң күзээшкиннерни боттанган, оларның 44-үн республиканың күүсекчи эрге-чагырга органнарның ажылдакчылары, а 167-зин муниципалдыг Соок-Ирейлер боттандырганын сагындыраал.
«Мээң-биле кады күзээли» деп бүгү-российжи төлевилелдиң «Күзелдер Шивизи» акциязы Тывада 2020 чылда эгелээн. Акцияның ачызында, кижи бүрүзү илбичи кылдыр хуулгаш, чаа чылда сагыштаан күзелдерни боттандырып болур.