Баян-Колда чаа эмчи амбулаториязы ажыттынган

«Кадык камгалалы» национал төлевилел-биле бөгүн, январь 6-да, Кызыл кожууннуң Баян-Кол сумузунда чаа эмчи абмулаториязын байырлыг ёзулал-биле ажыткан. Аңаа ТР-ниң Чазак Даргазының оралакчызы Елена Хардикова, Дээди Хуралдың Даргазы Каң-оол Даваа база кадык камгалал яамызының сайыды Анатолий Югай Баян-Кол сумузунуң чурттакчыларынга байырын чедирип келген.

«Бистиң республикавыс «Кадык камгалалының бирги звенозун эде чаартыры» деп федералдыг программада киржип турар. Программа дузазы-биле 2025 чылга чедир авария болур чыгыы эргижирээн эмнелегелерни чаартыры көрдүнген. «Кадык камгалалы» национал төлевилелдиң ачызында Тывага эрткен чылын 3 чаа ФАП-тарны болгаш 3 чаа эмчи амбулаторияларын ажыглалче киирген. 2021 чылда 9 объектилерни тудуп ажыткан. Бо чылын 5 чаа ФАП-тарны болгаш 1 эмчи амбулаториязын тудары планда көрдүнген» - деп, Анатолий Югай сумунуң чурттакчыларынга болгаш келгер аалчыларга дамчыткан.

Чаа эмчи амбулаториязынга 1500 кижи чаа эмнелге албан черинге баштайгы эмчи дузазын ап эгелээр.
Кадык камгалалының бир чугула көргүзүү – көдээ чурттакчыларга эмчи дузазын көргүзерде, эки байдалдарны тургузарында. Эмчи амбулаториязының ханаларын бедик шынарлыг тудуг ыяштары-биле тудуп үндүрген, чырыкты киирип, амгы үениң одалга болгаш изиг-соок суг системаларын кошкан. Төлевилелде бадылааны езугаар, чаа амбулаторияны чогуур эмнелге дериг-херекселдери, эт-сеп база оргтехника-биле четчелээн, дүрген харылзаалыг интернет четкизин база кожуп каан.