Республикага чаа чылда бир дугаар төрүттүнген чаш төл – ыраккы Тере-Хөлде

ТР-ниң Баштыңы Владислав Ховалыг бодунуң блогунга Тывага Чаа чылда бир дугаар чаш төрүттүнгенин демдеглээн:
«2023 чылдың бир дугаар төлү – ыраккы Тере-Хөл кожуунга төрүттүнген 2270 кг деңзилиг, 50 см дурт-сынныг кыс уруг болган. Балыктыг сумузунуң хамаатылары Буян Чигжит биле Аржана Самданнарның чеди дугаар кызы болуп чаш уруг төрүттүнген. ТР-ниң Чазак Даргазының оралакчызы Елена Хардикова болгаш кадык камгалал сайыды Анатолий Югай мээң даалгамны күүседип, чаа төрүттүнген чаш төлдүң ада-иезинге байыр чедирери-биле Тере-Хөл кожуунче аъттаныпты. Оон аңгыда, олар ук кожууннуң социал албан черлеринге чедип, хыналда ажылдарын чорудар ужурлуг.
Буян Семенович биле Аржана Семеновнага кыстыг болганы дээш бодумнуң өмүнээмден байырымны чедирип, өг-бүлезинге чедиишкиннерни, ынакшылды, аас-кежикти күзедим. База бир чаш төл төрүттүнгени-биле оларның ада-ие харыысалгазы улам улгаткан-дыр. Ынчангаш өг-бүлеге бот-боттарын деткижип, хүндүлежип чоруурун, ада-иениң хүлээлгезин күүседири чиик болурун күзедим.
Тере-Хөл кожууннуң социал ажылдакчылары хөй ажы-төлдүг өг-бүлеге бүгү талалыг дузаны кадып, ажы-төлдүң кижизидилгезинче кичээнгейни салыр дээрзинге идегедим».