Тываның Чазаанга кадык камгалал адырында күрүне премияларының лауреаттарын шаңнаан

2022 чылда Тыва Республиканың күрүне шаңналының эдилекчилери эмчилерни, 55-ки мотоадыгжы бригаданың шериглерин, волонтерларны база ажыл-ишчилерни Чазак бажыңынга шаңнап-мактаан. Республика Баштыңы Владислав Ховалыг чылыг-чымчак өөрүп четтириишкинниг сөстер-биле кады шаңналдарны, хүндүлүг аттарны, премияның лауреаттарынга акша сертификаттарын тывыскан.
Бо чылын кадык камгалал адырында «Буянныг чүрек» күрүне премиязын сес эмчи алган. Аңгы-аңгы номинацияларда тиилекчилерни илередип, 1 млн рубльдиң үш, 500 муң рубльдиң ийи, 333 муң рубльдиң үш сертификаттарын тудускан.
Аңгы-аңгы деңнелдерниң шаңналдарын 21 кижи алган.
Тожунуң ТКЭ анестезиолог-реаниматологу Айлан Ким-ооловна Кечилек («Экстремалдыг байдалда ажылы дээш» номинация), Тыва Республиканың Перинаталдыг төвүнүң анестезиолог-реаниматолог эмчизи, чаа төрүттүнген чаштарның реанимация база интенсивтиг терапия салбырының эргелекчизи Владимир Дегутович Демчик («Чуртталганың эгези» номинация), Барыын-Хемчиктиң кожууннар аразының эмнелге төвүнүң гинеколог эмчизи Саяна Сааяевна Сюрюн («Чылдың камгалалы» номинация) Тыва Республиканың кадык камгалал яамызында «Буянныг чүрек» күрүне премиязының лауреаттары болбушаан, 1 млн рубль түңнүг сертификаттарны алган.
Тыва Республиканың Перинаталдыг төвүнүң гинекология салбырының эргелекчизи Темир Николаевич Монгуш биле республиканың 1 дугаар эмнелгезиниң нейрохирургия салбырының нейрохирург эмчизи Владимир Владимирович Иргит “Кижиниң амы-тынын камгалаан ховар кезиишкинни кылганы дээш” деп номинацияга тиилээш, 500 муң рубльдиң сертификаттарын алганнар.
Республиканың консультативтиг-диагностика төвүнүң хирургия салбырының эргелекчизи, хирург эмчизи Солангы Валерьевна Монгуш, республиканың кеш-шээр аарыглар диспансериниң кол эмчиниң организастыг болгаш методиктиг ажыл талазы-биле оралакчызы, дерматовенеролог эмчизи Андрей Петрович Обухов, регионнуң хан-дамыр төвүнүң диагностика болгаш эмнээшкинниң рентгенхирургия аргаларының талазы-биле эмчизи, республиканың 1 дугаар эмнелгезиниң кезер эмчизи Сылдыс Михайлович Ондар «Чылдың технологиязы» номинацияда 333 муң рубльдиң премиязын алганнар.
Республиканың уруглар эмнелгезиниң ниити эмнелге албанының диетолог эмчизи Людмила Юрьевна Шрубту регионнуң кадык камгалалын хөгжүдеринге үлүг хуузу база хөй чылдарда ак сеткилдиг күш-ажылы дээш «Тыва Республиканың Улустуң эмчизи» хүндүлүг атка төлептиг болган.
Тыва Республиканың ЫМК девискээр фондузунуң директору Вера Ховалыговна Анай-оолга Тыва Республиканың «Шылгараңгай күш-ажылы дээш» медальды тывыскан.
55-ки даг адыгжы бригаданың дайынчылары Оттук Николаевич Донгак, Аяс Григорьевич Монгуш, Монге Херелович Тагба, Сылдыс Андрианович Шивитти шериг албан-хүлээлгезин күүседип тура көргүскен эрес-дидим, маадырлыг чоруу дээш, «Буян-Бадыргы орденниң» III чергези-биле шаңнаан.
Тускай шериг операциязында киржип турар Россия Федерациязының шериг албанныгларынга көргүзер ачы-буян акцияларынга киржилгези болгаш идепкейжи хамааты туружу дээш, «Чудо-клубочки» хөй-ниити организациязының волонтёру Евгения Сергеевна Бабкинага база Тываның гидрометеорология база долгандыр хүрээлел мониторинг төвүнүң агрометеоролог-техниги Надежда Михайловна Логачёвага Тыва Республиканың Өөрүп четтириишкин бижиин тывыскан.
Тыва Республиканың Чазааның чанында Тываның гуманитарлыг болгаш тускай социал-экономиктиг шинчилелдер институдунуң башкарыкчы эртем ажылдакчызы Уран Алдын-ооловна Донгакка тыва эртемниң хөгжүлдезинге улуг үлүг-хуузу база хөй чылдарда ак сеткилдиг күш-ажылы дээш «Тыва Республиканың эртеминиң алдарлыг ажылдакчызы» хүндүлүг атты алган.
Р.Д. Кенденбиль аттыг республиканың уран чүүл школа-интернадының фортепиано клазының башкызы Людмила Викторовна Ядыкина культура болгаш уран чүүл адырында өөредилгени хөгжүдеринге үлүг-хуузу база үре-түңнелдиг ак-сеткилдиг күш-ажылы дээш, «Тыва Республиканың культуразының алдарлыг ажылдакчызы» хүндүлүг атка төлептиг болган.
Каа-Хем кожууннуң Чонну ажылга хаара тудар төвүнүң директору Николай Бойдуевич Сарыгларга хөй чылдарда ак сеткилдиг күш-ажылы дээш. «Тыва Республиканың алдарлыг ажылдакчызы» хүндүлүг атты тывыскан.
«Тыва Республиканың өөредилгезиниң алдарлыг ажылдакчызы» хүндүлүг атты Сүт-Хөл кожуун чагыргазының өөредилге эргелелиниң школа назыны четпээн өөредилге талазы-биле методизи Наталья Чоодуевна Сарыгларга, «Тыва Республиканың алдарлыг юризи» хүндүлүг атты Россия Федерациязының Юстиция яамызының Тыва Республикада эргелелиниң начальниги Чодураа Дажиевна Ооржакка тывыскан.