Тываның суур чурттакчылары чуртталга байдалын экижидер күрүне деткимчезин алган

«Көдээ девискээрлерниң комплекстиг хөгжүлдези» күрүне программазының иштинде «Көдээ девискээрлерде чурттап турар хамаатыларның чуртталга байдалын экижидери» программа-биле Тывада 35 кижи күрүне субсидиязын алган. Ол сорулгага федералдыг болгаш республика бюджеттеринден 45,9 млн. рубльди тускайлаанын республиканың Көдээ ажыл-агый болгаш аъш-чем яамызы дыңнаткан.
Тударын планнаан бажыңның шөлүнден социал төлевирниң хемчээлин санаар, күрүне программазының негелдези езугаар төлевир алыкчызы тудуг өртээниң 30 хуузун бодундан үндүрер. 2020 чылдан эгелеп, программа-биле тудар бажың албан чаагайжыттынган болурун айыткан.
Чижээ, Чеди-Хөл кожуундан ветеринар эмчи, дөрт ажы-төлдүң адазы Сылдыс Монгуш 108 дөрбелчин метр шөлдүг бажың тудуунга 2,2 млн. рубльди алган.
Күрүне программазынга ажыл-чорудулганың аңгы-аңгы адырларында специалистер киришкен. Көдээ ажыл-агый яамызының дыңнатканы-биле алырга, АҮК 8 ажылдакчызы, 14 башкы, 8 эмчи, 3 культура ажылдакчызы база өг-бүле болгаш ажы-төлге социал дуза төптериниң 2 специализи көдээ черлерге боттарының бажыңнарын тударынга күрүне деткимчезин алганнар. Ол деткимчени алган специалистер суурга 5 чыл иштинде ажылдаар.
«Көдээ девискээрлерниң комплекстиг хөгжүлдези» күрүне программазының күүселдези-биле Тывага 127 кижилиг 35 өг-бүле боттарының чуртталга байдалын экижиткен. 2023 чылда 2 028 дөрбелчин метрден эвээш шөлдүг чуртталга тудуу ажыглалга кирер.
Республиканың 45 көдээ чурттакчызы 2022 чылда программа боттанылгазы-биле социал төлевирлерни алган, 12 кижи чаа бажыңнарынче чурттап кирген.