Тывада ОРВИ болгаш грипптен аарыыры көвүдээн

Тывада грипптен аараан кижилерниң саны дөрт неделя иштинде сыыгаваан. Росхереглелхайгааралының регион эргелели эрткен неделяның дөрт хонуунда республикада грипптен аараан 2124 кижи бүрүткеттингенин, ооң мурнунда неделяда ол көргүзүг 1005 кижи турганын дыңнаткан. Аараан кижилерниң 1344-ү 14 харга чедир бичии уруглар. 223 бадыткаттынган таварылгаларның 77-зинде - грипптиң A(H1N1) хевири, азы хаван гриппи, 139-унда - грииптиң чаа хевири база 7-зинде - грипптиң В хевири бар.
Ооң-биле чергелештир коронавирустуң чаа хевиринден аараан таварылгалар демдеглеттингенин эмчилер айыткан. Эрткен неделяда коронавирустан 34 кижи аараан, лаборатория хүнде ортумаа-биле беш таварылганы бадыткап турар.
Республика эпидемиологтуг көргүзүгде четпээни бадыткаттынган. Тываның чурттакчыларның 63,3 хуузу тарыттырып алганындан,байдал эки бооп турар деп, специалистер тайылбырлаан.
Регионнуң Баштыңы Владислав Ховалыг Росхереглелхайгааралдың девискээр эргелелиниң хөй кижилер чыылган база хааглыг черлеринге маска кедер чурумну республикага чарлаар дээн саналын деткээнин сагындыраал. Эмнелге, социал база өөредилге организацияларынга камгалал маскаларны албан кедер. Ол ышкаш садыг, хөй-ниити чемненилгези, банк, күрүне болгаш муниципалдыг эрге-чагырга ажылдакчылары маскалыг кедер.
Республиканың эпидемиологтары эпидемияга удур комплекстиг хемчеглерни хажыт чок сагыырын сүмелээн. «Ол дээрге эпидбайдалды тударынче угланган хемчеглер болур. Чүгле ынчаар, ылаңгыя уруглар-биле ажылдыг организацияларда, халдавырдан массалыы-биле аарыырындан чайлап болур. Улуг кижилер аразында назылап кыраан улус – айыылдыг бөлүкте кирип турар. Аарыгны аар эртпес дизе, профилактиктиг арга-сүмелерни шупту сагыыр ужурлуг» - деп, Россияның хереглекчилер эргелерин камгалаар база кижиниң чаагай чоруун хайгаарар федералдыг албанның регионда эргелелиниң удуртукчузу Людмила Салчак тайылбырлаан.