Вице-премьер Елена Хардикова: Чаңгыс аай пособиени санап тура, мобилизастаттынган хамаатыларның хандырылгазын көрбес

Тываның Чазааның даргазының оралакчызы Елена Хардикова база Россияның Пенсия фондузунуң Тывада салбарының башкарыкчызы Светлана Кенденниң киришкени брифингиде, хөй эвес орулгалыг өг-бүлелерни деткээн амгы беш хевирниң төлевирлер орнунга, келир чылдың январь 1-ден киирер чаңгыс аай пособие дугайында тайылбырлааннар. 2023 чылдың январьдан ажылдап эгелээр Россияның Социал фондузу төлевирни төлээр.
Эрте хуусаазында учетта туруп алган иштиг херээженнер, 17 хар чедир назылыг ажы-төлдүг ада-иелер чаа төлевирни алырлар. Хереглелдиг өг-бүлелерге социал деткимче хемчеглерин: келир үениң авалары, 3 харга чедир бирги база үшкү уруу, 3-7 харлыг, 8-17 харлыг ажы-төл дээш амгы үеде төлеп турар төлевирлерни чаңгыс пособие кылдыр каттыштырган.
Чаңгыс аайлажыткан чурум өг-бүлелерге төлевирлерни бөдүүн болгаш билдингир болдуруп, ада-иелерге чаа пособиеже шилчилгени таарымчалыг кылган.
Бадылаан чурум ёзугаар, чаңгыс аай пособиени регионда тургускан амыдырап-чурттаарының кудуку хемчээлинден эвээш орулгалыг өг-бүлелерге томуйлаар. 2023 чылдың январь 1-ден Тывада ол түң 14519 рубльга дең.
Төлевирни аңаа хереглелдиг кижилер алыр кылдыр, өг-бүлезиниң орулгаларынга база өнчү-хөреңгизинге ниити үнелелди санап үндүрер.
Тываның Чазааның даргазының оралакчызы Елена Хардикова орулгалар дугайында чугаалап тура, долу эвес мобилизация-биле кыйгырткан хамаатыларның өг-бүлелериниң кижи санынга ортумак орулгазын санаарда, мобилизация төлевиринден орулганы санавас деп демдеглээн.
Пособиениң хемчээли орулгаларындан база хамааржыр. Уругар пособиезиниң хемчээли регионда уругларга амыдырап-чурттаарының кудуку хемчээлиниң 50%, 75% азы 100% бооп болур. 2023 чылдың январь 1-ден, Тывада уругларга амыдырап-чурттаарының кудуку хемчээли 14433 рубль. Ынчап кээрге уругларга чаңгыс аай пособие: 50 хуу болза – 7216,5 рубль; 75 хуу болза – 10824,75 рубль; 100 хуу болза – 14433 рубль болур.
Иштиг херээженнерниң пособиезиниң хемчээли ажылдап шыдаар назылыг кижилерге амыдырап-чурттаарының кудуку хемчээлиниң 50, 75, 100 хуузу болур. 2023 чылдың январь 1-ден Тывада ол хемчээл 15826 рубль акша. Келир үениң аваларының чаңгыс пособиези бо хире болур: 50 хуу болза – 7913 рубль; 75 хуу болза – 11869,5 рубль; 100 хуу болза – 15826 рубль.
Пособиениң чаа хевиринче шилчиир үени база айыткан. 2022 чылдың декабрь 31-ге чедир төрүттүнген, 3 хар чедир назылыг ажы-төлдүг ада-иелер уруу үш харлыг апаргыже, эрги чурум-биле төлевирни ап болур. Чаңгыс аай пособиени томуйлапканда, “эрги” төлевирже шилчиири болдунмас.
Күрүне ачы-дуза порталы таварыштыр пособие алырынга билдиришкинни декабрь 28-тен эгелеп берип болур. Россияның Социал фондузунуң клиент офистери база хөй ажыл-чорудулгалыг төптер хамаатылардан билдиришкиннерни январьның 9-тан хүлээп эгелээр.
Россияның Пенсия фондузунуң Тыва Республикада регионнуң контакт төвүнүң 8-800-600-0492 телефону таварыштыр ажыл хүннеринде 09:00 - 18:00 шактарда тургустунган айтырыгларын салып болур.