Тываның Баштыңының Ёлказынга муң-муң школачылар киришкен

В. Көк-оол аттыг Национал хөгжүм-шии театрынга Тываның Баштыңының чаңчыл болган Чаа чыл ёлказы болуп эрткен. Школачыларны ийи аңгы бөлүктээн байырлалга республиканың 19 муниципалдыг тургузугларындан ниитизи-биле муң хире өөреникчи киришкен. Бо удаада уруглар Пушкинниң тоолдарынга үндезилээн шиини сонуургап көргеннер. Ёлканың ийиги кезээнде “Харны кым оорлапканыл?” деп хөглүг көргүзүгнү көрген. Уруглар Соок-ирей база Харжыгаш-биле кады ырлап-хөглеп, танцылааннар.
Бо чылын Тываның Баштыңының ёлказында уруглар саны хөй: салым-чаяанныг, эки өөредилгелиг өөреникчилер, бичии спортчулар, аңгы-аңгы олимпидалар, хөгжүм мөөрейлериниң тиилекчилери, амыдыралдың берге байдалында таварышкан өг-бүлелерниң ажы-төлүнден аңгыда, тускай шериг операциязында киржип турар шериг албанныгларның 450 ажыг уруг-дарыын база чалаан. Хөглээшкинниг программадан аңгыда, уругларга республика Чазааның бажыңынга солун экскурсияны организастаан. Оолдар, уруглар республика удуртукчуларының ажылдаар өрээлдерин база хуралдаар залдарны эргип, Ак бажыңның информастыг төвү – парлалга албанының студиязын сонуурганнар.
Тываның Баштыңының ёлказынга тускай шериг операциязының киржикчилериниң ажы-төлүнүң чамдыызы аңгы-аңгы чылдагааннар-биле кээп шыдаваан, ынчалза-даа оларга чаа чыл белектерин кожуунда эртип турар байырлал хемчеглеринде тыпсыр. Ол өг-бүлелерниң ажы-төлүнче онза кичээнгейни салырын Владислав Ховалыг айыткан.
Декабрь 23-те, Дээди Хурал Кызылда шериг албанныгларның 500 хире ажы-төлүн хаара туткан Чаа чыл ёлказын эрттиргенин сагындыраал. Оон аңгыда, Россия Федерациязының Чырыдыышкын яамызының декабрь 23-тен 25-ке чедир Москвага эрткен ёлказынга Тываның кадет корпузундан үш сургуул киришкен. Аңаа Россияның шупту регионнарындан өскүс база ада-иезиниң хайгааралы чок арткан талантылыг ажы-төл киржип турар. Бо удаада Чырыдыышкын яамызының ёлказынга 10-14 харлыг 600 ажыг уруг киришкен. Оларның аразында Тываның кадет корпузунуң сургуулдары – чедиги классчы Айдаш Халбаажык, Василина Галандарян база бешки классчы Сергей Колмаков бар. Үш хүн дургузунда кадеттер найысылалды сонургап, байырлал шинчизинче шименипкен Москвага экскурсиялап, Чаа чылдың цирк мюзиклиниң чаа көргүзүүн көрүп, Океанариумга барган. Байырлал программазында кол болуушкун - олимпий чемпиону Татьяна Навканың тургусканы «Шахерезаданың ынакшылының төөгүзү» дош көргүзүү эң солун болган.