Тывада 2023 чылда амыдырап-чурттаарының кудуку хемчээлин доктааткан

Тываның Баштыңы Владислав Ховалыг 2023 чылда Тыва Республикада амыдырап-чурттаарының кудуку хемчээлин доктааткан документиде атты салган. ТР-ниң Чазааның 2022 чылдың декабрь 21-де №834 доктаалы езугаар, чурттакчы чоннуң кижи санынга база социал-демографтыг кол бөлүктерге онааштыр амыдырап-чурттаарының кудуку хемчээлин эде санаан.
2023 чылдың январь 1-ден республикада бир кижиге амыдырап-чурттаарының кудуку хемчээли ниитизи-биле 14519 рубль, ажылдап шыдаар кижилерге - 15826 рубль, пенсионерлерге – 12486 рубль, бичии уругларга 14433 рубль кылдыр доктааткан.
Чазактың доктаалын Тыва Республиканың албан езунуң сайтызындан база Эрге-хоойлу медээлериниң албан езунуң интернет порталындан (www.pravo.gov.ru) көрүп болур.
2022 чылда амыдырап-чурттаарының кудуку хемчээли ийи катап өскерилгенин сагындыраал. Январьның 1-ден бирги индексацияны кылган болза, июнь 1-ден ийи дугаар өскен. Чылдың бирги чартыында, Тывада бир кижиге онааштыр ол көргүзүг 12781 рубль турган болза, ийиги чартыында -14059 рубльге дең апарган.
Амыдырап-чурттаарының кудуку хемчээли уругларга, пенсионерлерге база ажылдап турар кижилерге аңгы болур. Амыдырап-чурттаарының кудуку хемчээли өзерге, уруглар пособиелериниң, соцкерээлерниң, пенсияларга федералдыг болгаш регионнуң социал немелделериниң хемчээли улгады бээр.