Тывадан онколог-хирургка Россияның Президентизи “Дагдыныкчы чоруу дээш” деп шаңналды тывыскан

Декабрь 20-де, Кремльдиң Екатерина залынга, Россия Федерациязының дээди күрүне шаңналдарын тыпсыр ёзулал болуп эрткен. Өөредилге, эртем, медицина болгаш кадык камгалал, үлетпүр, көдээ ажыл-агый, далай транспорту болгаш өске-даа адырларда шылгараңгай российжилерниң ажыл-чорудулгазын дээди күрүне шаңнадары-биле демдеглээн. Шаңнатканнарның аразында Тыва Республиканың кадык камгалалының хоочуну, хирург-онколог Алевтина Кыргысовна Сиразитдиновага Президент «Дагдыныкчы чоруу дээш» деп ачы-хавыяа демдээн тывыскан.
Алевтина Кыргысовна Сиразитдинова кадык камгалал шугумунда 56 чыл ажылдап турар. Бодунуң дагдыныкчы ажылының үре-түңнелдерин шаңнал тыпсыр езулал үезинде чугаалаан: 13 ординаторну белеткешкен, оларның бежи медицина эртемнериниң кандидады эртем аттарын камгалап алган. Кадык камгалалының хоочуну ооң «эскертинмес күш-ажылынга» бедик үнелелди бергени дээш, четтиргенин илереткен.
Алевтина Кыргысовна Тыва Республиканың онкология албанын тургузуп, хөгжүдериниң эге чадазындан ажылдап эгелээн. Ажылдап чораан үелеринде дыка хөй кезиишкиннерни кылып, амбулаторлуг онкологияны сайзырадып, амбулаторлуг байдалдарда ыжыктарны илередип база кезерин дыка эки билир. Химиотерапияның бирги аргазын ажыглап эгелээн. Химиотерапияның ажыглалынче, херел-биле эмнээр методиканы экижидеринче улуг кичээнгейни салган.
Алевтина Кыргысовна –аныяк специалистериниң арга-дуржулгалыг дагдыныкчызы, республикада дыка хөй аныяк хирургтарны болгаш онкологтарны кижизидип өстүрген: медицина эртемнериниң кандидаттары Алефтина Шивит-оол база Александр Ванданов, Солангы Ховалыг, Салбак Хирлиг-оол болгаш өскелер-даа.
Алевтина Сиразитдинова онкология талазы-биле эмчи дузазын көргүскениниң шынарынга «Капитал» КАН-ның эксперти. Республиканың кадык камгалалының аңгы-аңгы албан черлеринге ажылдап чорааш, кадык камгалалында дыка хөй айтырыгларны көдүрүп, шиитпирлээн. Онкология албанының материалдары-биле эртем ажылдарын чорударының эгезин салып, химиотерапевтке, ийи хирург-онкологтарга, херел диагностиказының эмчизинге кандидат эртем адын камгалаарынга идигни берген.
Кезер эмчи, онколог-хирург эмчи Алевтина Кыргысовна Сиразитдинованың күш-ажылын – участок эмнелгезинден эгелээш республиканың тускайжыттынган эмнелге албан черинге чедир, ординатор эмчиден кадык камгалалының организаторунга чедир ооң эрткен күш-ажылчы оруун Тыва Республиканың база Россия Федерациязының Чазаа бедии-биле үнелээн. Тыва Республиканың база Россия Федерациязының кадык камгалалынга ачы-хавыяазы дээш, 1991 чылда «Тыва АССР-ниң алдарлыг эмчизи», 2006 чылда « Россия Федерациязының алдарлыг эмчизи» аттарны тывыскан. Ол 2018 чылда Россияның эмчилериниң «Үнелээшкин» деп дээди шаңналының «Мергежилинге бердингени дээш» угланыышкынынга лауреат болган бирги тыва эмчи.