Донбасста Тывадан волонтер эмчилерни шаңнаан

Декабрь эгезинде Донбассче аътаныпкан бөлүк тыва эмчилер бо чоокку хүннерде чанып кээр. Тываның Баштыңы Владислав Ховалыг ооң дугайында дыңнаткан. Дайынчы хөделиишкиннер зоназында коллегаларынга дузалажыр дээш эки тура-биле чеде берген тыва эмчилерни дүүн Донецк Улус республикага шаңнаан.
«Дайынчы хөделиишкиннер үезинде балыгланган кижилерниң амы-тынын камгалаар дээш, декабрь эгезинде Тыва Республикадан келген сес эмчиге Донецк Улус Республиканың чазааның база бодумнуң өмүнээмден шаңналдарны тывыстым» - деп, ДУР кадык камгалал сайыды Дмитрий Гарцев дыңнаткан. Тывадан эрес-дидим волонтерлар хүннүң-даңның аткылажыышкында таваржып турар Горловка база Светлодарскыга когараан кижилерге дузаны чедип турарын демдеглээн. «Бистиң республиканың чурттакчыларынга дузаны көргүзери-биле шыырак специалистерни чорударынга деткимчени көргүскени дээш, Тывага четтирдим» - деп, Гарцев чугаалаан.
Тывадан эмчилер делегациязы Донбасстың эмчилеринге практиктиг дузаны көргүзер дээш, бо чылын ийи дугаар барып турарын сагындыраал. Эмчи волонтёрларның бирги десантызы тускай шериг операциязының зоназынга апрельде чораан болза, Тываның Баштыңы Владислав Ховалыгның ДУР-нуң Чазааның даргазы Виталий Хоценко-биле декабрь эгезинде телефон дамчыштыр чугаазында, республикага эмчи күштери ам-даа херек дугайында дыңнадырга, дараазында делегация кончуг дүрген белеткенгеш, үнүпкен.
Хирург Айдын Серен-оол, хирург-эндоскопист Арсений Ондар, травматолог-ортопед Эргил Чадамба, анестезиолог-реаниматолог Буян Монгуш, анестезиолог-реаниматолог Арыш Сат база кезер эмчи сестразы Алдынай Монгуш болгаш фельдшер-анестезист Чимис Балдан эмчи бригадазының составы-биле Донбассче чорупкан. Күрүне Думазының депутады, травматолог-ортопед эмчи Айдын Сарыглар делегацияны удуртуп чоруур. Эмчилер ажылга эң-не херек апаар чүүлдерин ап алганнар.