Хөй-ниити ажылдакчызы Анна Терджанян: Айыткалда өг-бүлелер деткиир дугайында бодалдарга ие кижи болгаш таарзындым

Тываның Дээди Хуралынга Тыва Республиканың Баштыңының Айыткалын таныштырар езулалга армян диаспораның төлээзи, хөй-ниитичи Анна Терджанян бир дугаар киришкен. Ооң мурнунда республиканың бирги удуртукчузунуң кол стратегтиг айтыышкыннарын МИЧ-тен билип ап турган. Айыткал – республиканың социал-экономиктиг байдалын экижидеринче тодаргай базымнарны айыткан регионнуң амыдыралында чугула болуушкун болур деп санап турар:
«Ава кижи болгаш, социал адырда планнаан хемчеглерге таарзындым. Ылаңгыя ажы-төлдүг өг-бүлелерни деткиир дээни, кончуг эки-дир. Чазактың хүн айтыырыында тыва дылдың айтырыы база катап киргенинге, дыка өөрүдүм. Чүге дизе, дылды кадагалап албас болза, чоннуң культуразын чидирип ап болур бис. Улуг совет чогаалчы Чингиз Айтматов «Чоннуң өлүм чогу – ооң дылында» деп чугаалаанын утпаалыңар.