Тывада “ОНФ аныяктары” команданың удуртукчузу Буян Сонам: Баштыңның Айыткалында аныяк салгалга өөрүнчүг медээлер бары онза

Россияның Улусчу фронтузунуң Тывада аныяктар командазының координатору Сонам Буян ниитилелге ажыктыг салгалды кижизидип өстүрер дээн Айыткалдың угланыышкыны аныяктар болгаш элээдилер ортузунда чаа ажыл-херектерни эгелээринге эки чагыг бооп турарын демдеглээн:

- Тываның Баштыңы Владислав Ховалыг Тыва Республиканың Дээди Хуралынга ээлчеглиг Айыткалында тыва чоннуң улуг өнчүзү - тывада дылче онза кичээнгейни углап, келир чылын Кызылдың ийи дугаар школазын тыва национал гимназия кылдыр эде тургузар деп чугааланыгга дыка өөрүдүм. Ол дээрге биске, аныяктарга, аныяк салгалга дыка өөрүнчүг медээ болуп турар. Чүге дизе, бистиң тыва дылывысты болгаш культуравысты келир үениң салгалы – чаштарга, дуңмаларывыска дамчыдып, өөредири эң кол чүүл деп санаар мен. Ийиде, Айыткалда күш-ажылга ынак, бодунуң база чуртунуң салым-чолу дээш харыысалгалыг, ниитилелге ажыктыг кижи кылдыр аныяк-өскенни кижизидер ажылдарга идепкейлиг киржилгени манап тур дээн кыйгызын хүлээп ап, ол талазы-биле чаа ажыл-хемчеглерни амдыгааштан эгелээри чугула деп демдеглеп алдым.