Тыва композитор Владимир Токаның чогаалдары – чурттуң кол стриминг шөлдеринде

«Мелодия» үн бижидер компания тыва композитор Владимир Токаның чогаалдарын «Енисей акварели» деп аттыг албом кылдыр үндүрген. Тыва симфониктиг хөгжүм Россияның амгы төөгүзүнде  чурттуң онлайн-дамчыдылгазының агымында бир-ле дугаар көстүп келгени ол. “Владимир Токаның Енисей акварели” хөгжүмнүг чогаал салгалы” төлевилел боттаныышкыны-биле, Красноярск крайның филармониязы 2022 чылдың июльда композиторнуң чогаалдарын бижиткенин сагындыраал.
Дирижёр Михаил Мосенковтуң башкарганы Красноярскиниң академиктиг симфониктиг оркестри программаны ойнап күүсеткен. Композиторнуң алды чогаалы: «Таёжная» №2 симфония, оркестр-биле №2 скрипкага концерт, «Молодёжная» хореографтыг сюита, концерт вальзы, «Дуруяа» романс, гобойга, фортепианога база хылдыг хөгжүм оркестринге ноктюрн ынаар кирген.
Делегей конкурстарының лауреаттары солистер Леонид Железный (скрипка), Карина Ховалыг (сопрано) база Алексей Балашов (кларнет) ооң бижидилгезинге киришкен. Д. Шостакович аттыг Санкт-Петербургтуң академиктиг филармониязының специализи Алексей Барашкин үн бижидилгезин режиссёрлаан.
Сентябрь 22-де республикага Красноярскиниң академиктиг симфониктиг оркестриниң бирги гастрольдарның үезинде, В. Көк-оол аттыг Национал хөгжүм-шии театрының сценазындан хөгжүм чогаалдарының күүселдезин Тываның чурттакчылары дыңнаан. Красноярскиниң чону Токаның кол чогаалдарының партитураларының чамдыызын Тыва Арат Республиканың 100 чылын байырлаан концертинде танышкан.
Красноярск филармониязының чиңгине директору Евгений Стодушный бо бижидилге - Тываның шупту академиктиг хөгжүм салгалы Енисей Сибиринде онзагай регион кылдыр ону эде көөрүнге чүгле бирги базым болган деп чугаалаан. «Бистиң сорулгавыс – тыва симфониктиг хөгжүм делегейин эң-не хөй аудиторияга нептередири» – деп демдеглээн.
Бижидилгелерни «Мелодияның» сайтызындан, ол ышкаш Яндекс.Музыка, Звук, ВК база YouTube онлайн-дамчыдылгалар шөлдери таварыштыр дыңнап болур.