Максим Монгужукович Мунзукка тураскаалды Тываның национал театрында тургускан

13.12.2022 РФ-тиң Камгалал яамызының Культура департаментизиниң директору Артём Горный, РФ-тиң Камгалал яамызының Культура эргелелиниң культурлуг программалар килдизиниң начальниги Ольга Фаллер, скульптураның автору, Максим Монгужуковичиниң ажы-төлү, үре-салгалы Тываның национал театрында тургускан тураскаалдың презентациязынга киржип келген.
Орус географтыг ниитилелдиң чагыы-биле, Акира Куросаваның Оскар шаңналын алган кинозундан аңчы Дерсу Узаланың овур-хевиринде шылгараңгай тыва артисти сиилбээн скульптурлуг композицияны М.Б. Греков аттыг шериг чурукчулар студиязының скульптору Дмитрий Клавсуц кылган.
Акира Куросаваның «Дерсу Узала» деп кинозунда кол ролю-биле делегейде сургажаан РСФСР-тиң база Тыва АССР-ниң улустуң артизи Максим Мунзук бо чылын 110 харлап турар.
Тураскаалды байырлыг байдалда таныштырып, концерт программазы-биле үдээн. В. Тока аттыг симфониктиг оркестрниң күүселдезинде классиктиг хөгжүм ойнап, "Саяннар" театр "Сугнуң калчаазы" деп танцы композициязын база Томас Монгуштың баянга үделгези-биле Кызылдың уран чүүл колледжизиниң херээженнер ансамбли ыры номерлерин көргүзүп, Национал театрның артистери "Дээр суу узаал-ла!" деп шииден үзүндүнү ойнап, "Дерсу Узала" кинону тырттырып турар үеде Максим Мунзуктуң дугайында солун ужуралдарны көргүскен барымдаалыг фильмден үзүндүнү көргүскен.
Скульптурлуг композицияны эге дээрезинде Кызылдың төвүнде, Тываның парламентизи биле республика прокуратуразының аразында шөлге тургузарын планнаан турган. Тураскаалды тургузарынга шөлдү белеткээн, ындыг болзажок республикада соой бергени-биле тураскаалды чазын ажыдар деп шиитпирлээн.
«Юбилейлиг чылда тураскаалды тургузуптар бодаан бис, ындыг болзажок Максим Монгужукович боду театрын таварыптар дээн ышкаш, байдалдар боду ынчаар тургустуна берди» - деп, культура сайыды Виктор Чигжит чугаалаан.
Япон режиссёр Акира Куросаваның совет экранга тырттырганы «Дерсу Узала» деп кинозу 1975 чылдың июль 23-те IX Москваның делегей чергелиг кинофестивалынга кол шаңналды чаалап алган. Владимир Арсеньевтиң «По Уссурийскому краю» база «Дерсу Узала» чогаалдары-биле кинонуң сценарийин бижээн.
Оон бээр чартык чүс чыл, тодаргайлаарга 47 чыл эрте-даа берген болза, кино бөгүнде безин онза чугулазын салбаан. Тайгада аңчы Дерсуда кижиниң сагыш-сеткилинге дээптер ёзулуг кижини көргүзүп турары анаа-ла ынчаар эрте бербес.
Чылыг дүжүптерге, Тываның найысылалының төвүнде белеткээн шөлүнге скульптура композициязын тургузуптар. Уран чүүлдүң шылгараңгай ажылдакчызынга тураскааткан тураскаал ол үеге чедир Национал театрның фойезинге турар.