Тывада суурлар чурттакчылары боттарының ФАП-тарынга диспансеризацияның бирги чадазын эртип ап болур

Сөөлгү ийи чылда Тываның кадык камгалалы бурунгаар хөгжүлделиг базымнарын кылган деп, республиканың кадык камгалал сайыды Анатолий Югай дыңнаткан. «Кадык камгалалы» национал төлевилелче 2022 чылда каттышкан «Кадык камгалалының бирги звенозун модернизастаары» федералдыг улуг программаның ачызында ол чедип алдынган.
Югайның дыңнатканы болза, бирги звено чаартылгазының программа күүселдези-биле чүгле бо чылын Тывага 94 санныг аңгы-аңгы дериг-херекселдерни саткан, оларның 86-зы ам келир. Чүгле республика чергелиг эвес, а кожуун, суурларның эмнелге организациялары дериттинип, четчелеттинген.
Программа амгы үениң медицина техниказы-биле чепсеглээринден аңгыда, ниити материал-техниктиг баазаны быжыглаарынче угланган. 2022 чылда эмнелге организацияларынга 10 автомобильди саткан, суурларда алды эмнелге пунктуларын туткан, үш объектиге капитал септелгени чоруткан.
Кадык камгалалының бирги звенозун эде чаартканындан. ФАП-тарда телемедицина консультацияларын берип, ажылчын олуттарны автоматчытканындан суур чурттакчыларынга электроннуг эмчи картазын ажыдып берип турар. 2023 чылда аарыг кижилер шинчиткен чүүлдериниң харыызын Күрүне ачы-дузаларының сайтызында хуу кабинединден ап болур апаар. Көдээ суурлар чурттакчылары хоорай улузу ышкаш, чурттап турар черинден үнмейн, тускай мергежилдиг эмчилерниң консультациязын, кадыкшылын камгалаар профилактика программазының хемчеглерин алырлар. Көдээниң чурттакчылары боттарының ФАП-тарынга диспансеризацияның бирги чадазын эртип болурун сайыт демдеглээн. Ийиги чаданың эмчи дузазын сөөлгү үениң медицина дериг-херекселдерин ажыглап көргүзер. Бо чылын 6288 хемчегни чаартынган дериг-херекселдерни ажыглап организастаанын сайыт демдеглээн.
«Кадык камгалалы» национал төлевилелдиң «Кадык камгалалының бирги звенозун модернизастаары» программа 2025 чылга чедир ажылдаар.