Тываның национал диаспоралар төлээлери Донбасстың чурттакчыларынга белектерни чедирер

Донецк база Луганск улус республикаларның, Запорожье база Херсон областарның чуртакчыларынга гуманитарлыг дуза көргүскен “Чоннар чылдар өттүр кады” деп федералдыг төлевилелде Тыва киржип, республиканың националдар херектериниң талазы-биле агентилелдиң директору Владимир Хабаров баштаан регионнуң национал чоннарын төлээлээн Тыва Республикадан делегация ында чеде берген. Регионнар болгаш чоннар аразының харылзааларын быжыглаар дээш, Россиядан хөй-ниити каттажыышкыннары база хамааты активчилер-биле чаа каттышкан регионнар чурттакчыларының аразында харылзааны тургузары – төлевилелдиң сорулгазы.
Чоннарның найырал бажыңы Националдар херектериниң талазы-биле федералдыг агентилелдиң деткиишкини-биле улуг төлевилелди организастаан. Азербайджан диаспораның удуртукчузу Чингиз Алиев, ТР-ниң националдар херектериниң талазы-биле агентилелдиң удуртукчузу Владимир Хабаров, «Тува – 24» телеканалдың корреспондентизи Сайгын Бюрбю Тывада чоннар диаспоразын төлээлеп, Россия Федерациязының чаа субъектилериниң чурттакчыларынга гуманитарлыг дузаламчыны чедирер дээш Кызылдан үнүпкеннер.
Волгоград хоорайда Найырал бажыңының эптиг-найыралдыг командазы тыва делегацияны уткуп алганнар. Тывада национал диаспораларның чыгган акша-хөреңгизи-биле чаа регионнарның чурттакчыларынга чугула херек чүүлдерни база аъш-чем аймаан саткан. Национал общиналар акша-хөреңгизи-биле уругларга 300 Чаа чыл белектерин садып алганын, Волгоградттың Найырал бажыңының курлавырлары дыңнадып бижээн.
Владимир Хабаров биле Чингиз Алиев акция киржикчилери хоорайлар чурттакчыларынга чаңчыл езугаар плов кылыр продуктулар белеткээринге киришкен. Волгоградтың Найырал бажыңының кежигүннери – афган, осетин, дагестан, азербайджан, көрей болгаш өске-даа национал диаспоралар-биле кады пловка херек продуктуларны садып, белеткээннер.
Амгы үеде акцияның национал десантызы Луганск улус республикада чеде берген. Луганскының чурттакчыларынга тыва хөөмей дээш, концерт программазын көргүзүп, Азияның төвүнден белектерни уругларга тыпсыр.