Тыва биле ДУР кады ажылдажылганың аргаларын чугаалажып көрген

Бо хонуктарда ажыл-агыйжы сургакчылаашкын-биле Донецк Улус Республикада чоруп турар Тываның Баштыңы Владислав Ховалыг Тывадан шериг албанныглар болгаш Донбасста коллегаларынга дузалажыр дээш аъттаныпкан тыва эмчилер-биле ужуражыр.
Тыва Республиканың Баштыңы Владислав Ховалыг Донецк Улус Республиканың Чазааның даргазы Виталий Хоценко-биле телефон дамчыштыр чугаалажып турда, ук регионга эмчилер чугула хереглеттинип турары билдине бергенин сагындыраал. Ындыг медээни дыңнап кааш-ла, тыва эки турачы эмчилер эң-не херек чүүлдерин чыып алгаш, орукче үнүпкен. Делегацияның составынче дөрт эмчи база Чөөн-Хемчик кожуунда эмнелге төвүнүң эмчи сестразы Алдынай Монгуш, туберкулезка удур диспансерниң анестезист фельдшери Чимис Балдан кирген. Республиканың 1 дугаар эмнелгезиниң кол эмчизи, хирург Айдың Серен-оол, хирург-эндоскопист Арсений Ондар, травматолог-ортопед Эргил Чадамба, анестезиолог-реаниматолог Буян Монгуш, Чөөн-Хемчиктиң ММЦ анестезиолог-реаниматологу Артыш Сат эмчилер санында. Күрүне Думазының депутады, травматолог-ортопед эмчи Айдың Сарыглар делегацияны удуртуп чоруур.
Бо чылын Тывадан волонтер эмчилерниң ийиги бригадазы Донбассче чоруп турары ол. Апрельде бирги состав чораанын сагындыраал. Россияның шупту регионнары ышкаш, республика шериг операциязының эгезинден эгелеп Донбасстың чурттакчыларынга дузаны көргүзүп турар.
Эмчилер Донецк Улус Республикада эки чедип келгеш, госпитальдарның бирээзинде ажылдап эгелээнин Виталий Хоценко чугаалааш, республиканың дузааргаа база шудургу дүрген хөделгени дээш Тываның Баштыңынга өөрүп четтиргенин илереткен.
Удуртукчулар сургакчылаашкын үезинде, ийи регионнуң кады ажылдажылгазын чугаалашкан. Ол ажылдар тодаргай сорулгаларлыг болурун Хоценко демдеглээн.
«Бистиң республикаларның аразынга Дугуржулганы ажылдап кылырын дугуржуп алдывыс - деп, Владислав Ховалыг бодунуң блогунда бижээн. – Кады ажылдаар ажылдар хөй. Ачы-дуза чедирилгезин ам-даа уламчылаар бис - ол эң кол. Экономика, культура-спорт адырында, делегациялар-биле солчулгада кады ажылдаар аргаларны база көрдүвүс».