Тываның эпидемиологтары грипп көдүрүлбээнде тарыдып алырын сүмелээн

Росхереглел хайгааралының Тывада эргелелиниң медээзи-биле алырга, ооң мурнунда чеди хонукка бодаарга, эрткен неделяда Кызылда ОРВИ-ден аараан 778 таварылга бүрүткеттинген, республика эпидемиологтуг байдалда четпээн. Халдавырлыг инфекция калбаа-биле нептеревээнде, тарылганы салдырып алыр үе чонда барын эксперттер айыткан.
Сөөлгү ийи неделяда грипп аарыы 28 хуу көдүрүлгенин Россияның хереглекчилерниң эргелерин камгалаар болгаш хайгаараар чер демдеглээн. 10 муң чурттакчы чонга онааштыр алырга, 58,4 кижи, а эрткен неделяда 45,6 кижи турган. Россияның 71 субъектизинде чаа коронавирус халдавыры, а 31 субъектиде грипп нептереп көвүдээн. Ол ышкаш грипптээш, эмнелгеде чыдар кижилер саны база хөй.
Тываның Кадык камгалал яамызы хары угда элээн каш халдавырлар – коронавирус база грипп (пандемиялыг база хаван), сезоннуг өске-даа халдавырлыг аарыглар – микс-инфекция тарап болурун демдеглээн.
Ынчангаш грипптен камгаланыр дизе, тарылганы салдырар. Коллективтиг иммунитетти хевирлээринге, улуг кижилерниң 80 хуузун коронавируска удур, а чурттакчы чоннуң 60 хуузун гриппке удур тарыыр.
Регионнуң Кадык камгалал яамызы Тывада 181043 кижи грипптен тарытканын дыңнаткан, азы планның 90,9 хуузу. Кандыг-бир чылдагаан-биле тарыдып четтикпээн кижилер, аарыг өөскүвээнде тарып алыр аргалыг. Шак ынчалдыр аарыгны бергедеп эртеринден камгаланып болур.
Бичии уруглар, иштиг херээженнер, назылап кыраан, хоочураан аарыгларлыг кижилер, медицина болгаш өөредилге, садыг-саарылга, ЧКА адырының ажылдакчылары, малчыннар вакцинаны халас салдырып ап болур. Тарыышкынны чурттап чериниң поликлиниказынга салдырар.
Холдарны доктаамал чуп, хөй кижи чыылган черлерге масканы кедип, өрээлдерни агаарладып, аштап-чүлгүп тургаш, грипптен чайлай бээриниң аргазы барын эмчилер сагындырган.