РФ-тиң Чазаа Тываның чонну ажылга хаара тудар төптерниң чаартылгазынче акша-хөреңгини тускайлаан

Чурттакчы чонну ажылга хаара тудар төптерни эде чаартырының ийиги чадазынче регионнар аразындан Тыва Республика кирген.
РФ-тиң Чазааның даргазы Михаил Мишустин 17 субъектиге 3,3 млрд рубль хемчээлдиг субсидияны бээр дугайында доктаалга атты салган. Күрүне албан черин таныттынгыр чаңгыс аян-хевирлиг кылдыр септеп дериир. Ажыл чок хамаатыларны ажылче хаара тударының ортумак үези бүдүн чартык катап эвээжээр.
2019 чылда чонну ажылга хаара тудар төптерни эде чаартыр шенелдениң бирги чадазы эрткен. Ынчан чурттуң 73 регионунда 150 албан черлерин хаара туткан. Ийиги чадада чүгле аңгы төптерге эвес, а субъектиде кадрлар албанын эде чаартыр.
2021 чылда Тыва Республикага чоруткан бирги чадада чүгле чаңгыс организацияны – Кызыл хоорайның чонну ажылга хаара тудар төвүн чаартып кылган. Бо чылын «Демография» национал төлевилелдиң “Ажылче хаара тударынга деткимче” күрүне программазы-биле Таңды кожууннуң чонну ажылга хаара тудар албанының кадрлар төвүн бүрүнү-биле чаартып турар. 2024 чылга чедир регионда кадрлар албанының беш төвүн эде кылыры планнаттынган.
Тывадан аңгыда, Чувашия, Удмуртия, Пермь край, Тула, Нижегород, Липецк, Калуга, Тамбов база Кострома областарда Чонну ажылга хаара тудар төптерниң албаннарынга комплекстиг эде чаартылганы чорудар.