Тываның Баштыңының дорт эфиринче 400 чыгыы айтырыглар кирген

Тываның Баштыңы Владислав Ховалыгның бөгүн, ноябрь 26-да тус черниң үези-биле 15:00 шакта болур дорт эфиринге 400 ажыг айтырыглар болгаш санал-оналдар республиканың удуртукчузунуң “Вконтакте” социал четкиде хууда арынынга болгаш Тыва регион башкарылга төвүнүң арынынче кирген.
Тыва регион башкарылга төвүнүң аналитиктериниң сайгарганы-биле алырга, айтырыглар, санал-оналдарның чээрби беш хуу хирези чуртталга бажыңнарының тудуу болгаш чурттакчы чоннуң бажыңнар хандырылгазы-биле холбаалыг.
Кирген айтырыгларның он бир хуузу чер дугайында, сес-тос хуузу одаар чүүл болгаш электри энергиязынга, чеди хуузу хоорай, суурларның чаагайжыдылгазынга, алды хуу хирези өөредилгеге хамаарышкан.
Тываның Баштыңы Владислав Ховалыгның дорт эфиринге айтырыгларны, саналдарны элээн каш бөдүүн аргалар-биле чорудуп болур:
1. “Телеграм” мессенджерни ажыглап турар кижилерге тускай чат-ботту кылган: @glavatuva_bot
2. «Вайбер»-ни ажыглап турарлар айтырыгны https://qptr.ru/Rn8F бот таварыштыр чорудары эптиг.
3. «Платформа обратной связи» федералдыг система дамчыштыр электроннуг харылзааның тускай хевирин Тываның Баштыңының дорт эфиринге таарыштыр ажылдап кылган: https://pos.gosuslugi.ru/lkp/direct-line/120/
4. «ВКонтакте» социал четкиде Тыва Республика регион башкарылга төвүнүң албан ёзузунуң арынын дамчыштыр: https://vk.com/tsur17.
Айтырыгларның болгаш саналдарның бижимел хевирин, ол ышкаш бижимелдиг чуруктарны, аудио азы видеоматериалдарны чорудуп болур. Бодунуң ат-сывын, айтырыгның кол утказын демдеглеп каар болза эки.
“Телеграм” болгаш «Вайбер» мессенджерлер дамчыштыр айтырыглар чоруткан кижилерге дорт эфир эгелээн дугайында СМС медээлер чедип кээр.
Республиканың чурттакчы чону-биле Тываның Баштыңының дорт чугаазының сөөлгү минуталарынга чедир айтырыгларны хүлээп алыр.