Тываның кадык камгалалының бирги звенозунуң чаартылгазынче 2023 чылда 248 млн рубльди шилчидер

2023 чылда кадык камгалалының бирги звенозун чаартыр регион программазы-биле Тывага объектилер тудар тудуг организациязын шилиири эгелээн. ТР-ниң Кадык камгалал яамызының медээзи-биле алырга, программаның объектилеринге садыглажыышкынны чарлап, ол ажылдарже ниитизи-биле 248,8 млн акшаны көрген – федералдыг бюджеттен 243, 2 млн, республиканыындан – 5,7 млн. рубль.
«Кадык камгалал» национал төлевилел күүселделиг программаның сорулгазы – чурттакчы чоннуң шупту бөлүктеринге эмчи дузазының чедингирин улгаттырарында. Чурттакчяылыг черлерниң аайы-биле бирги эмчи-фельшер дузазының чаа объектилерин ажыдып, тускай мергежилдиг кадрлар-биле четчелеп, амгы үениң дериг-херекселдери-биле четчелээри көрдүнген.
Чаа-Суур, Шивилиг, Белдир-Арыг, Сыстыг-Хем, Кочетов суурларга фельдшер-акушер пунктуларын тудары база планнаттынган. Мөрен суурга эмчи амбулаториязынтударынче 62,93 млн. рубльди тускайлаан.
Бирги звенонуң эмнелге организацияларынга автотранспорт садырынче 14 млн рубльга 10 чагыгны кылган. Бай-Тайга, Каа-Хем, Кызыл, Тес-Хем, Эрзин кожууннарның эмнелгелерин, Чөөн-Хемчик база Улуг-Хем мунуципалдар аразының эмнелге төптерин, Ишкин база Алдан-Маадыр суураларда ниити практика эмчилерин автомашиналар-биле хандырар.
Эмнелге техникаларын четчелеп база эде чаартырынче 168,6 млн. ажыг рубльди планнаан. Ол акша-хөреңгиге муниципалдыг база республика чергелиг эмнелге албан черлеринге 86 санныг дериг-херекселдерни садар.