Тывадан тускай шериг операциязының киржикчилерин деткээн ачы-буян концерти болуп эртер

Четвергде, ноябрь 17-де, Улусчу чогаадылга бажыңынга “Кара ирбиш” («Чёрный барс») бөлүк тускай шериг операциязының киржикчилерин деткип ачы-буян концертин көргүзер. “Кара ирбиш” («Черный барс») - Луганск Улус Республиканың хоорай-суурларын националистерден хостаар тулчуушкуннар үезинде эрес-дидимин көргүскен мото-адыгжы бригадага чоннуң берген ады.
Элээн каш айлар иштинде дайынчы эштери-биле кады тулчуушкуннарга киришкеш, тускай шериг операциязындан чоокта чаа чанып келген Ачыты Нурсат чогаадыкчы коллективти тургускан.
«Тулчуушкун шөлүнде оолдарның хей-аъдын көдүрүп, оларга барып чедер хөреңгини чыып алыр дээш, бо хемчегни эрттиреривис ол» - деп, хөгжүмчүлер чугаалаан.
“Кара ирбиш” коллектив ийи кижиден тургустунган. Ындыг болзажок, Ачыты Нурзат хөөмейжи, ударник, бас-гитарист, гитарист база баянист кирген ыры-хөгжүм ансамблин чоорту тургузар бодалдыг. «Мээң күзелим бөдүүн-даа, нарын-даа: бистиң оолдарга материалдыг болгаш моральдыг дузаны көргүзер. Фронтуже гуманитарлыг дузаны чедирип, тускай операцияның шупту дайынчыларының база Донбасстың чурттакчыларының дайынчы хей-адын көдүрер. Тываларның улусчу чогаадылгазы, ужур-чаңчылдары-биле таныштырып, орус чоннуң ырыларын кады ырлажыр бис» - деп, Ачыты чугаалаан.
Улусчу чогаадылга бажыңынга “Кара ирбиш”-биле кады “Саяннар” хөгжүм болгаш танцы театрының артистери, ТР-ниң Национал оркестриниң солистери, «Алаш», «Амырга-Моос», «Сүлде» бөлүктер, «Найысылал» ансамбль, Росгвардияның ТР-де ыры ансамбли, «Пограничник» ВИА база республиканың билдингир артистери киржир.
Регионнуң Улусчу фронтузунуң удуртукчузу Саима Далчин, концерттиң билеттеринде «Всё для Победы» деп фондунуң QR-кодтары бар, хемчегниң киржикчилери ооң-биле чеже-даа түңнүг дузаламчыны киириштирип болурун тайылбырлаан. Чыгдынган акша-хөреңгини бистиң дайынчыларывыска херек чүүлдер садар кылдыр дамчыдар.