Тываның Тудуг яамызының удуртукчузу биле Тываның Баштыңы регионнуң тудуг адырының хөгжүлдезин чугаалашкан

РФ-тиң тудуг болгаш ЧКА сайыды Ирек Файзуллин биле Тыва Республиканың Баштыңы Владислав Ховалыг Россияның Тудуг яамызынга ужурашкан. «Чурттаар оран-сава болгаш хоорай хүрээлели» национал төлевилелдиң күүселдези, ол ышкаш республиканың тудуг адырын хөгжүдери болгаш чедир кылдынмаан объектилерни доозары - ажыл-агыйжы ужуражылганың кол темалары болган.
Росстаттың 2022 чылдың октябрь 1-де сан-чурагайындан алырга, Тыва Республикада 123,3 муң дөрбелчин чуртталга шөлү ажыглалче киирген, бо чылдың планындан 11 хуу хөй.
«Кызыл кожууннуң Каа-Хем суурда спорт-культура төвү» объект тудуун доозары регионга чугула айтырыг болуп артпышаан. Доостунмаан тудуг объектилериниң федералдыг даңзызынче киирер дизе, доктааткан негелделерге дүүштүр шупту документилерни чыырын Россияның Тудуг яамызының баштыңы Ирек Файзуллин сүмелээн. «Айтырыглар бар объектилер талазы-биле ажылды уламчылап, даңзыже оларны киирер дээш документацияларын таптыг кылыр» - деп, ол чугаалаан.
Тыва Республиканың Баштыңы Владислав Ховалыг: - «Каа-Хем суурда Преображенский чаа микрорайонунда комплекстиг тудугларның даштыкы инженер четкилерин хандырар бис. Ында 825 олуттуг школа тудуу эгелээн. Хөй аалдыг амгы үениң бажыңнарын тударынга эптиг байдалдарны тургузар. Оон ырак эвесте спорт-культура төвүн доозарынче бүгү-ле күжениишкиннерни салыр апаар бис» - деп, ол демдеглээн.
Тыва Республикада инженерлиг инфраструктура объектилерин тударынче инфраструктурлуг бюджет кредидиниң (ИБК) акша-хөреңгизин хаара туткан дөрт төлевилел боттанып турар. Спутник микрорайоннуң 3-кү, 4-кү кварталында, «Мөңгүн» микрорайонунда, Полигонная кудумчузунда микрорайонда база Иркутская кудумчузунда микрорайонунда комплекстиг тудугларның капитал тудуг объектилериниң даштыкы инженер четкилерин хандырырынче ол акша-хөреңгини угландырар.
РФ-тиң Тудуг яамызының парлалга албанының медээзинден