Тываның найысылал школаларынга диш эмнээр өрээлдерни ажылдадыр

Республиканың Кадык камгалал яамызы чурттакчы чонга шынарлыг эмчи дузазының чедирилгезин экижидер хемчеглерни ап чорудуп турар. Чаа өөредилге чылының эгелээни-биле чергелештир, Кызылдың чеди школазында стоматология кабинеттери ажыттынган. Чаа ажыткан кабинеттер уруглар поликлиникаларында оочурну эвээжедип, уругларның диш аарыгларын эмнээринге идигни бээр ужурлуг.
Уруглар стоматологиязының эргелекчизи Айя Канкованың чугаазы-биле алырга, стоматология кабинеттери чок школалар өөреникчилери фельдшеринден бижикти алгаш, кожазы школаларда кабинеттерже барып болур. Чижээ, 1 биле 7 дугаар школа өөреникчилери 15 дугаар лицейге, а 2 биле 4 дугаар школалардан 3 дугаар школаже барып, эмнедип болур. А Мурнуу микрорайонда ниити өөредилге албан черлериниң өөреникчилери 17 дугаар лицейже баар.
Бо чоокку үеде 18 дугаар лицейге, кадет корпузунга база школа-интернатка диш эмнээр өрээлдер ажыттынар. А уругларның стоматология поликлиниказында үш кабинетти немей ажыдары-биле, ону септеп, чаа дериг-херекселдер-биле дериир ажылдар чоруп турарын Канкова дыңнаткан. Республиканың кожууннарындан дүрген дуза херек уругларны күрүнениң уруглар стоматологиязы амдыызында хүлээп турар.