Якут дылче очулдуртунган «Хунан-Кара» деп маадырлыг эпостуң чаа үндүрүлгезиниң таныштырылгазы Тывага болуп эрткен

Саха (Якутия) база Тыва республикаларның аразында парламентилер кады ажылдажылгазы-биле, ЮНЕСКО-нуң камгалалының ачызында “Делегей чоннарының маадырлыг тураскаалдары” деп чоннар аразының төлевилели-биле номну белеткеп, үндүрген. Ооң таныштырылгазы Тыва үндезин культура төвүнге болуп эрткен. Тыва Республиканың Баштыңы Владислав Ховалыг, Дээди Хуралдың (парламент) депутаттары, Якутиядан хүндүлүг аалчылар, Тываның эртем ниитилежилгезиниң төлээлери болгаш өскелер-даа ук хемчегге киришкен.
«Акы-дуңмалышкы Саха Республиканың чону төрээн дылынга эң билдингир тыва эпостарның бирээзин номчааны чүден үнелиг-дир. Шак ынчаар чоннарның өртемчейже көрүүшкүнүн, оларның мөзү-бүдүжүнүң дөзүн болгаш ужур-чаңчылдарын илереткен маадырлыг эпостуң тулган дээн овур-хевирин көрүп, коллективтиг культура тураскаалы хевирлеттинер “ – деп, Тываның Баштыңы Владислав Ховалыг номнуң таныштырылгазында демдеглээн.
Тыва Республиканың Баштыңының Чарлыы-биле “Тыва Республиканың алдарлыг ажылдакчызы” хүндүлүг атты “Делегей чоннарының эпостары” делегей ассоциациязының вице-президентизи, Саха Республиканың Баштыңының чанында “Олонхо” Национал комитеттиң даргазы Александр Жирковка тывыскан. Мындыг улуг төлевилелди амыдыралга боттандырарын ол саналдап үндүрген. Россияның Президентизиниң чарлааны Россияның чоннарының Культура өнчү-салгалының чылында ол дыка улуг үлүг-хуулуг ажыл. Тывада якут делегацияның составы-биле келген артистер таныштырылга үезинде бараалгаан.
Саха Республиканың (Якутия) Баштыңы Айсен Сергеевич Николаевтиң, Саха Республиканың (Якутия) Күрүне Чыыжының даргазы Алексей Ильич Еремеевтиң, кожа-хелбээ Хакас, Алтай база Бурят республикаларның төлээлериниң, Россия Федерациязында ЮНЕСКО херектериниң талазы-биле комиссияның харыысалгалыг секретары Григорий Эдуардович Орджоникидзениң байыр чедириишкиннерин хөйге дамчыткан.
«Хунан-Кара» - тыва чоннуң маадырлыг аас чогаалының эң билдингир хевириниң бирээзи. Тоолчу Ооржак Чаңчы-Хөө Чапаажыковичиниң күүселдезинде тоолду 1959 чылда магниттиг кожаага бижиткен.