Айдың Чюдюкту Тываның Чазааның вице-премьеринде томуйлаан

31.10.2022 Тываның Баштыңы бөгүн аппарат хуралында чаа вице-премьер Айдың Чюдюкту чазак кежигүннеринге таныштырган. А. Чюдюк ТР-ниң Чазааның даргазының иштики политика талазы-биле оралакчызының хүлээлгезин күүседир. «Сөөлгү чылдарда чугула туруштарга ажылдааш, күрүне, муниципалдыг албанда улуг арга-дуржулганы ол алган - деп, Владислав Ховалыг кадрлар талазы-биле бодунуң томуйлаашкынын тайылбырлаан. - Бөгүнге дээр А.А. Чюдюк иштики политика адырының ажыл-чорудулгазын таарыштырып, ТР-ниң Баштыңының чөвүлекчилер албанын удуртуп турган. Ол угланыышкында ооң удуртукчу арга-дуржулгазындан үнген эгелээшкиннерни база планнарны деткип турар мен». Регионнуң удуртукчузу Дээди Хуралдың депутаттарынче чаа албан-дужаалга Чюдюктуң кандидатуразын бадылаар кылдыр бо чоокку хүннерде киирер. Тайылбыр: Айдын Алексеевич Чюдюк 1987 чылда Кызыл хоорайга төрүттүнген. 2010 чылда Москваның банк херээниң институдун, 2018 чылда «Сибирь» керээ системазы” КХН-ге «Күрүне, муниципалдыг база корпоративтиг садыглаашкын башкарылгазы» программага профессионал эде белеткелди; 2019 чылда «Регион» КХН-ге - «Персоналды удуртуру» программа-биле эде белеткелди эрткен. 2010-2018 чылдарда Кызыл хоорай мэриязынга, ол ышкаш чер болгаш өнчү хамаарылгаларының департамент начальнигинге, 2018-2021 чылдарда «Тываэнергосбыт» АН-га ажылдаан. 2021 чылдан республика чазаанда удуртукчу албан-дужаалдарда ажылдап турар.