Тыва «Географтыг диктантыны» бижиир

31.10.2022 Орус географтыг ниитилелдиң октябрь 30-де болуп эртер «Географтыг диктант» VIII чырыдыышкын акциязынга Тываның чурттакчылары база киржир. Республиканың чазаа диктант бижииринге белеткел ажылдары чорудар база ону эрттирер организастыг комитетти тургускан. Чазактың социал политика айтырыгларын харыылап турар вице-премьери Елена Хардикова ону удуртур. Тываның 17 муниципалдыг кожуунунда база ийи хоорайында 38 шөлчүгештерге «Географтыг диктантыны» 12 шакта бижип эгелээр. Школалар, училищелер база техникумнар, ол ышкаш шериг комиссариаттары акцияны эрттиреринге боттарының өрээлдерин берген. «Мээң черим. Мээң чуртум. Мээң ажыдыышкыннарым» деп кыйгының адаа-биле диктантыны бо чылын бижиир. Диктантыда ийи кезекке чарган 40 айтырыг бар. Географиядан билдингир факт-барымдааларга даянган ниити билигниң 10 айтырыы бирги кезекте кирген. Ийиги кезээнде бодал, ужур-чурум база ханы билиглер негеттинер 30 айтырыг барын организаторлар демдеглээн. Орус географтыг ниитилелдиң организастыг чөвүлелиниң даргазы Владимир Путинниң инициативазы-биле 2015 чылда географтыг диктантыны бир дугаарын бижээнин сангындыраал. Диктант чеди чыл дургузунда шупту диптерни шыва ап, Арктикага база Антарктидага, ол ышкаш Делегейниң космиктиг станциязынга безин бижиттинген. Шупту 2,4 млн. ажыг кижи диктантыга киришкен. Диктант 2017 чылда делегей чергезинче бир дугаар үнген. Акцияга каттышкан шупту чурттарның саны 122 чеде берген.