Тывада мобилизаттынган хамаатылардан тургустунган мото-адыгжы батальонну үдээн

31.10.2022
     Кызылда мото-адыгжы бригаданың баазазынга Тыва Республикадан кыйгырткан хамаатылардан тургустунган батальонну үдээн. Дайынчылар Россия Федерациязының Президентизи, дээди кол командылакчы В.В. Путинниң Төрээн чуртувустуң айыыл чок чоруун хандырып, ону камгалаар дээн айтыышкынын күүседири-биле аъттыпкан.

     «Берге үеде чыскаалче үнүп келиринге белен езулуг эрлер Тывада барынга чоргаарланып тур мен. Силер дээш, шупту сагыш човап тур бис. Тываның муң-муң чурттакчылары, республикавыс, шериглерге, эки турачыларга база дайынчыларга дузаламчы чыыр дээн чонувустуң чаагай чаңчылында каттышканын дидим чугаалап болур мен. Хүндүлүг чаңгыс чер-чурттуглар! Төрээн Тывавыс база өндүр улуг чуртувус силер-биле кезээде кады! Хүлээлгеңерни чедиишкинниг күүсеткеш, тиилелгелиг чанып келиңер!» - деп, Тываның Баштыңы Владислав Ховалыг мобилизацияже кыйгытканнарга чагаан.

     Тываның Баштыңы октябрь 31-ден, понедельниктен эгелеп, мобилизацияже кыйгыртканнарның азы оларның өг-бүлелериниң агар саннарынче 100 муң рубль акшалар кирип эгелээрин дыңнаткан. ТР-ниң Күш-ажыл болгаш социал политика яамызы документилерин шуптузун шүүштүрүп хынаан, акша-хөреңгини тускайлаан.

     55-ки аңгы мото-адыгжы бригаданың (дагжы) командири, майор Азат Фатхутдинов, ТР-ниң Дээди Хуралының (парламент) спикери Каң-оол Даваа, Россия Федерациязының национал гвардия шериглери федералдыг албанның Тыва Республикада эргелелиниң начальниги, полицияның полковниги полиции Андрей Кука, Тыва Республиканың Камбы-Ламазы Гелек Нацык-Доржу, Кызыл епарихиязының төлээзи, Амвросий ада болгаш өскелер-даа байырлыг хемчегге киришкен.

     Тываның улустуң артизи Станислав Ириль, улустуң хөөмейжизи Мөңгүн-оол Ондар, Тываның алдарлыг артизи Борбак-оол Салчак дайынчыларга аян-ырны бараалгаткан.

     Мобилизацияже кыйгырткан хамаатылардан тургустунган мото-адыгжы батальон бир ай чыгыы тускай белеткелди эрткенин демдеглээлиңер. РФ-тиң камгалал сайыдының даалгазы езугаар, тускай шериг операциязынга киришкен дайынчы арга-дуржулгалыг офицерлер өөредилгени берген.