«Россияның почтазы» Тывада 8 көдээ салбырларны эде чаартырын доозуп турар

28.10.2022  «Почта Россияның почтазы» АН-ның Сибирь макрорегионунуң директору Александр Завьялов Тываның Баштыңы Владислав Ховалыг-биле ужуражып тура, көдээ почта салбарыларын эде чаартыр программа дугайында таныштырган. РФ-тиң Президентизиниң даалгазы езугаар модернизация программазы-биле 2022 чылда республикада почта харылзаазының 8 салбырынга улуг септелгени кылган. 8 объектиниң амгы үеде 1 салбыры ажыттынган, 3 объект 100 хуу белен (ажыдып болур), 4 объектиде септелге ажылдары 95 хуу кылдынып, доостурунуң кырында.
«Тээли, Мугур-Аксы, Барлык, Шекпээр, Хандагайты, Чаа-Хөл, Балгазын база Эрзин суурларда салбырларга капитал септелгени кылыры-биле Тываже 50 хире млн рубльди шилчиткен. Россияның почтазының удуртулгазы-биле дугуржулга езугаар, Барлык биле Шекпээрде почта салбырларынга МФЦ харылзаазын киирип, күрүне болгаш муниципалдыг ачы-дуза чедирилгезиниң шынарын бедидерин чедип алыр. Ол ажылды Тываның чурагайлыг хөгжүлде яамызы хандырар» - деп, Тываның Баштыңы ужуражылга соонда бодунуң блогунга бижээн.
«Россияның почтазы» АН республика девискээринде социал ужур-дузалыг ажылды чорудуп турар. Республиканың 17 муң ажыг чурттакчыларынга пенсияны почтальоннар чедирер. Оон аңгыда, мобильдиг терминалдар дамчыштыр коммунал ачы-дуза төлевилерин база үндүрүглер чыылдазын хүлээп турар. Ооң-биле холбаштыр Тываның чедери берге кожууннарынче пенсияны үе шаанда чедирер ажылды организастаарының аргаларын ийи тала сайгарып чугаалашкан.
Россия Федерациязының өнчүзүнче Тыва Республика биле муниципалдыг тургузугларның өнчүзүнде шимчевес өнчү объектилерин улаштыр дамчыдар айтырыгларны “Россияның почтазы” АН-ның устав капиталынче немелде киирилде кылдыр киирерин ужуражылгада чугаалажып көрген.