Тывада онза камгалалдыг бойдус девискээрлеринче төлевирни доктааткан

29.09.2022 Тываның Чазаа онза камгалалдыг категорияга хамааржыр бойдус девискээрлеринче төлевирлиг кирер кылыр шиитпирни үндүрген. Сентябрь 27-де чогуур доктаалды бадылаан. «Тайга», «Шуй», “Үш-Белдир» база «Шанчы» дөрт кластер участоктарындан тургустунган регион деңнелдиг “Тыва” бойдус парыгынче кирери өртектиг болур.
Документини ажылдап кылган ТР-ниң Арга-арыг ажыл-агыйы база бойдус ажыглалының яамызы онза камгалалдыг бойдус девискээрлерлери-биле кызыгаарлашкак суурларның чурттакчылары ынаар халас кирип болурун тайылбырлаан. Ол ышкаш онза камгалалдыг бойдус девискээрлериниң кызыгаарында чер участоктарының ээлерин база хөлезилекчилерин, девискээрни камгалап-карактаар база хөгжүдери-биле холбашкан объектилер тудуунда киржип турар кижилерни, бодунуң хүлээлгелерин күүседип турар албан-хаакчыларны, долгандыр хүрээлел камгалалының хөй-ниити инспекторларын, бойдус камгалалының акцияларын эрттирер дээн волонтерларны төлевирден хостаан. Арткан кижилер доктааткан төлевирни төлээр.
Чижээ, Тываның найысылалы Кызылдан ырак эвесте, Бии-Хем кожуунга хамааржыр “Тайга” участогунче кирерде амыдырап-чурттаарының федералдыг кудуку хемчээлиниң 0,66 хуузу хире – 85,9 рубль төлевирни доктааткан.
Найысылал чурттакчыларның дыштаныр хүннерде агаарлаар черлериниң бирээзи - «Тайганың» девискээринде хаак баазазы база бар. Специалистерниң санап турарындан алырга, дыштаныр хонуктарда хүнде 100-ден эвээш эвес кижи ында дыштанып турар, а чылда чартык миллион орулганы ап болур.
«Шуй», «Үш-Белдир» база «Шанчы» онза камгалалдыг бойдус девискээрлеринче кирер төлевирни оон аар – амыдырап-чурттаарының кудуку хемчээлиниң 3,3 хуузу, тодаргайлаарга 429,8 рубль кылдыр тургускан. Ол девискээрлер улуг суурлардан ыракта, чылда 150-200 хире кижи кирип турар.
Онза камгалалдыг бойдус девискээрлеринче киргени дээш чыгдынган төлевир акшазын ол черлерге бойдус камгалал база турисчи-рекреация инфраструктуразын тудар, ажаап-карактаарынче угландырарын документини ажылдап кылган яамы тайылбырлаан.
Чоокта республиканың чазаа бойдус тураскаалы болур Дус-Хөл хөлче база “Дүрген” күрүнениң бойдус заказнигинче кирерин бир кижиден 100 рубль деп доктаатканын сагындыраал.