Россияның VII бүгү-российжи пенсионерлер спартакиадазынга Тываның командазы киржир

26.09.2022 Регионнуң Пенсионерлер эвилелиниң даргазы Алла Хурума баштаан Тываның командазы -29 хүннеринде Тольятти хоорайга Россияның VII бүгү-российжи пенсионерлер спартакиадазының финалында республиканы төлээлээр.
«Спорт – амыдыралдың нормазы» федералдыг төлевилел-биле узун назылаарының бир барымдаазы спортту пропагандалап, күш-культура болгаш спортче хаара тудар сорулга-биле хоочуннар аразынга маргылдааны эрттирер.
Бо хонуктарда спортчуларга чаңгыс аай хептерни үлеп, эки көргүзүглерни көргүзери-биле шыңгыы белеткенип, организастыг чыышты чорудуп турар. Тывадан киржикчилер бодунуң база командазының бирги чери дээш спорттуң чеди аңгы хевринге киржир: чиик атлетика (кросс 1000 м база холушкак эстафета), эштири (50 м), стол теннизи, ок-биле кара адыры, шахмат, дартс, волейбол. Маргылдаалар үезинде 9, 10, база 11 чадага ГТО нормативтерин база дужаар.
– Бо хемчег улуг назылыг кижилерге боттарының кадыын камнаарынга идигни бээр. Бүгү-российжи пенсионерлер спартакиадазында төрээн черивисти төлээлээри улуг харыысалгалыг-даа, өөрүнчүг-даа-дыр – деп, команданың киржикчизи Рита Ли чоруур мурнунда чугаалаан.
«Спорт – амыдыралдың нормазы» федералдыг төлевилели-биле Россияның Пенсионерлер эвилелиниң Тыва салбырының төлээлери 2022 чылдың июльда Саяно-Шушенский ГЭС-ке база «Ергаки» бойдус парыгынга ийи хонук экскурсиялап, а 2021 чылдың декабрьда төлевилелден ойнап алганы грант акшазы-биле пенсионерлер ортузунга республиканың кышкы спартакиадазын эрттирген.