Тывада бичии даш-чонукчуларының аразынга "Чонар-Даш 2022" конкурсту чарлаан

23.09.2022 РФ-тиң Федерация Чөвүлелиниң сенатору Дина Оюннуң эгелээни чонар-даш уран чүүлүн сайзырадып, салым-чаяанныг уругларны илередиринче угланган конкурсту Тыва Республиканың Өөредилге болгаш Культура яамылары деткээн. Республиканың немелде өөредилге албан черлериниң кижизидикчилери база школаларның 5-11 класстарының өөреникчилери конкурска киржип болур.
Конкурс үш чадалыг. Бир дугаар чадазы октябрь 1-де школа деңнелинге эгелээр. Бирги чадазынга киржир чагыгларны октярь 1-ге чедир хүлээр. Дараазында шөлүгде https://forms.yandex.ru/u/632c0eb18e3f8643d2ab609f/ чагыгны онлайн хевирге долдургаш, азы chonardash2022@yandex.ru электроннуг почта адрезинче чорудар.
Ийиги чадазы – ноябрь 1-ден 15-ке чедир муниципалдыг деңнелге эки ажылдарның шилилгезин кылгаш, регион чадазынга киириштирер.
Декабрьның 15-18 хүннеринде Кызыл хоорайга конкурстуң боду, үшкү чадазы болуп эртер. Ынчан эксперттер болгаш жюри кежигүннериниң мурнунга конкурска киириштирер ажылын боду чонуп, сиилбиир.
Конкурстуң ол чадазында киржикчилерге культурлуг-өөредилге программазын: дагдыныкчыларның мастер-класстарын, чонар-даш уран чүүлүнүң мастерлери-биле ужуражылгаларны, Национал музейже экскурсияны, ойнаарактар театрынга шии, кинотеатрга кино көөрүн организастаар.
Декабрьның 18-те конкурстуң тиилекчилерин, призерларын болгаш киржикчилерин шаңнаар.
"Чонар-Даш-2022" конкурстуң, ооң чурумунуң база чорудуунуң дугайында элээн тодаргай тайылбырны «ВКонтакте» социал четкиде конкурстуң https://vk.com/chonardash2022 албан езузунуң бөлүүнден, «Контактыда» конкурстуң тургузукчулары база организаторларының https://vk.com/dina_ivanovna_oyun бөлүүнден көрүп болур.
Бир эвес айтырыглар бар болза, бо телефонче долгаар: +79919555737.