Ыраккы Тере-Хөл кожууннуң поликлиниказында капитал септелгени кылган

22.09.2022 Тере-Хөл кожуунга чедери берге ырак бол, тудугжулар төп эмнелгезиниң поликлиниказын чаартыр шупту ажылды хуусаазында дооскан. Поликлиника кожууннуң  беш суурунуң 2 муң хире чурттакчы чонун хандырып турар. Эмнелге албан черинде эмчилерге-даа, аараан кижилерге-даа таарымчалыг байдалдар тургустунган.
Тываның кадык камгалал сайыдының оралакчызы Орлан Ондар база республика яамызының административтиг ажыл-агый эргелелиниң директору Урана Монгуш ыраккы кожуунга чедип, капитал септелгениң шынарын хынаан.
Хуу сайгарлыкчы Танзыр Е. В. капитал септелге кылыр күрүне керээзин бо чазын ойнап алган. Эрги оран-саваның иштики ханаларын бузуп, таваан быжыглап, шалаларын чаарткан. Чаа соңгаларны, иштики эжиктерни салып, электри удазыннарын солуп, иштики шеверлел ажылдарын кылган.
“Кадык камгалалының бирги звенозун чаартыр программаның онзагайы - эң ыраккы база чедери берге черлерде эмнелге организацияларының бирги звенозун бүрүнү-биле чаартып, септээринде” – деп, сайыттың оралакчызы Орлан Ондар демдеглээн.
Кадык камгалал яамызы ыраккы төп кожуун эмнелгезин четчелеп, дерииринче кичээнгейни углаан. Республиканың өске эмнелгелери ышкаш, Тере-Хөлдүң төп эмнелгези көжүп чоруур рентген-аппаратты, чүректиң ажылдаарын хынаар хоптерниң аппарадын сөөлгү чылдарда алган. Орук муңзавас “Садко” маркалыг автомобильде кылган көжүп чоруур ФАП-ты "Кадык камгалалы” национал төлевилел күүселдези-биле эрткен чылын алган.
Амгы үеде Тере-Хөлдүң төп кожуун эмнелгезиниң чыдар салбырында септелге ажылдары кидин-түлүк.