Тывага тудугжуларның ийиги шуулганы болуп эртер

21.09.2022 Тыва Республиканың эрге-чагыргазы сентябрь 30-де Кызылга II тудуг шуулганын организастап эрттирер. Енисей Сибирин хөгжүдер корпорация - шуулганның оператору. Шуулган офлайн база онлайн хевирге, ensib.ru сайтыга дорт дамчыдар.
Шуулганның пленарлыг кезээн, болгаш тудуг рыноктарының хөгжүлдезинге, республиканың тудуг адырын хөгжүдер күчүзүнге база таарымчалыг хоорай хүрээлелин тударынга хамаарышкан стратегтиг сессияларның ажылын онлайн чурумдан көрүп болур. Чуртталга тудуу биле туризм адырында инвестиция болгаш перспективтиг төлевилелдер роуд-шоуларын дорт дамчыдылгага көргүзер.
Тудуг шуулганы-2022-же үжен ажыг спикерлерни, эрге-чагырга органнарының, күрүне хөгжүлде институттарының, биче болгаш ортумак бизнес субъектилериниң, адыр эксперттериниң чүс хире төлээлерин чалаан.
Тыва Республиканың I тудуг шуулганы 2021 чылдың октябрь 14-15-те болуп эрткен. Москва, Красноярск, Абакан, Кызыл, Иркутск, Самара база Санкт-Петербургтан, күүсекчи эрге-чагырганың адыр органнарының удуртукчуларындан дээш, тудуг адырының 30 ажыг эксперттери ук хемчегге киришкен. Тудуг шуулганының дамчыдылгазын 800 ажыг кижи көрген.