Красноярскиниң академиктиг симфония оркестри Кызылга Владимир Токаның 80 харлаанынга тураскаадып концертти көргүзер

20.09.2022 Тыва Республиканың шылгараңгай композиторларның бирээзи Владимир Тока бо чылын 80 харлаар турган. Ол хүнге тураскаадып Красноярскиниң филармониязы Тываның күрүне филармониязы-биле кады «Владимир Токаның Енисей акварели» хөгжүм салгалы» төлевилел-биле элээн каш хемчеглерни организастаан. Красноярскиниң академиктиг симфония оркестри Владимир Токаның уран чогаадылгазынга тураскааткан онзагай концертти сентябрь 22-де В. Көк-оол аттыг Национал хөгжүм-шии театрынга көргүзер.
Владимир Токаның «Енисей акварели» хөгжүм салгалы» төлевилел Президентиниң культурлуг инициативалар фондузундан деткимчени алган.
Бирги тыва джазменниң юбилейинге тураскааткан хемчег эрткен чылын эгелээн. 2021 чылдың ноябрь 14-те, И.В. Шпиллер аттыг биче концерт залынга, Владимир Салчаковичиниң «Тайга черниң симфониязы», «Байырлал увертюразы» база «Оркестрге гобой-биле ноктюрн» чогаалдарын ойнаан. Красноярск крайның культура сайыды Аркадий Зинов база Тыва Республиканың культура сайыды Виктор Чигжит, тыва филармонияның удуртулгазы, композиторнуң уруу концертти көрген.
2022 чылдың июль эгезинде Красноярскиниң филармониязынга тыва хөгжүмчүнүң чогаалдарын бижиткен. Красноярскиниң академиктиг симфония оркестри дирижёр Михаил Мосенковтуң удуртулгазы-биле авторнуң алды чогаалын: «Тайга черниң симфониязы», «2 дугаар скрипкага оркестр-биле концерт», «Аныяктар», «Концерт вальзы» хореографтыг сюита, «Дуруяа» деп ырызын, гобойга, фортепианога база хылдыг хөгжүм оркестринге ноктюрнны ийи хүн бижиткеннер.
Бо бижидилгелерни Россияның электроннуг нота библиотеказынче киирген болгаш, чурттуң уран чүүл өөредилге черлеринге өөредилге материалдарынга ажыглаарынга таарымчалыг. Владимир Токаның чогаалдарының бижидилгезин Красноярскиниң филармониязының сайтызында (https://krasfil.ru/collective/1/Krasnoyarskii-akademi..) салган.
2022 чылдың ноябрьның 10-13 хүннеринде Тываның национал оркестри Красноябрь хоорайга эртер Енисей Сибири национал оркестрлер фестивалынга концерт программазын көргүзер планныг.