Тываның найысылалынга улустуң артизи Максим Мунзукка тураскаалды Дерсу Узаланың овур-хевиринге кылып тургузар

16.09.2022 Акира Куросаваның «Дерсу Узала» деп кинозунда кол рольду ойнааш делегейге алдаржаан РСФСР-ниң база Тыва АССР-ниң улустуң артизи Максим Мунзукка тураскаалды Тывага ажыдарынга белеткел чоруп турар. Чоннуң артизиниң 110 харлаанынга ол хемчегни тураскааткан. Республиканың Баштыңы Владислав Ховалыг белен тураскаалды октябрь эгезинде Тывага эккээрин дыңнаткан.
Орус география ниитилелиниң чагыы езугаар, М.Б. Греков аттыг Шериг чурукчулар студиязының скульптору Дмитрий Клавсуц Дерсу Узала аңчының овур-хевиринге Максим Мунзуктуң скульптурлуг композициязын сиилбип үндүрген. Тываның делегейге эң билдингир ылгавыр демдектериниң бирээзи ол апаар деп, Владислав Ховалыг демдеглээн.
Кызылдың төп черинде - Дээди Хурал биле республика прокуратуразының аразында шөлге тураскаалды тургузар деп, регионнуң баштыңы чугаалаан. Амгы үеде тураскаал турар черни арыглап, аштап, чаагайжыдып, чырыдар дериг-херекелдерни эптеп турар. Ол ышкаш шөлге улуг даштарны салып, аян киирер.
«Максим Монгужукович – Тывада төөгүлүг кижи. Ада-чурттуң кинозунда балалбас исти артырган. «Ак-көк хемниң кижилери», «Дерсу Узала», «Сибириада», «Хой чарынынга төлге» дээш, ооң киришкени өске-даа киноларны көрүп өскен бис. Ол үеде Максим Монгужуковичиниң ады эң билдингир, республиканың брендизи турган. Тываның уран чүүлүнге ол эң хөйнү кылган» - деп, Владислав Ховалыг бодунуң блогунда бижээн.