Тывада «социал» хөмүрнү дүжүрүп эгелээн

16.09.2022 Тывада одалга сезону эгелээни-биле, регионнуң баштыңы “Социал хөмүр” губернатор төлевилелиниң күүселдезин онза кичээнгейде алган. Бо чылын хөмүр алыкчыларынга 402 өг-бүле немешкен. Владислав Ховалыгның даалгазы езугаар ам 3624 өг-бүле деткимчени алыр. Сентябрьның 15-тен 3436 өг-бүлеге хөмүрнү чедиер болза, чедери берге черлерде чурттап турар 188 өг-бүлени одаар ыяш-биле хандырар.
Тыва Республиканың Чазааның даргазының социал адырны харыылап турар оралакчызы Елена Хардикова, муниципалдыг районнар чагыргалары-биле кады деткимче алыкчыларның даңзызын чартык чыл иштинде тургузуп келгенин чугаалаан. Күрүне деткимчези алыр кижилерниң төнчү даңзызын апрельде бадылаан.
Кожууннарның социал деткимче төптеринде хөмүр алыр өг-бүлелерниң даңзызын арттырган. «Социал хөмүр» социал төлевилел-биле талон алган кижилерни демдеглээр журналдар төптер бүрүзүнде бар.
Халас хөмүр алыр эң хөй өг-бүлелер Кызыл хоорайда чурттап турар. Даңзыда хөй ажы-төлдүг 585 өг-бүле кирген. Тожу, Тере-Хөл база Каа-Хем кожууннарда чедери берге черлерде 188 өг-бүле одаар ыяшты алыр.
Тываның Одалга болгаш энергетика яамызы кожууннарже хөмүр сөөртүрүнүң графигин тургускан. Ведомствонуң керээ чарганы «Транспорт сервизи база төлевилел» КУБ хөмүр сөөртүлгезин организастаар.
Төлевилел боттанылгазынче бо чылын республика бюджединде а 22 млн рубльди тускайлаан, ооң-биле 370,22 тонна хөмүрнү база 9 02,4 куб. м ыяшты саткаш, транспорт-биле сөөртүп чедирер.
Төлевилелди эгелээни 2016 чылдан бээр, дөрт болгаш оон хөй ажы-төлдүг 10957 өг-бүле күрүне деткимчези кылдыр 2 145 килограмм хөмүрнү база 4,8 кубометров ыяшты алганнар.