Тываның одалга болгаш энергетика сайыдында Владимир Фунтиковту томуйлаан

12.09.2022 Тываның Баштыңының чарлыы-биле ТР-ниң одалга болгаш энергетика сайыдынга регион найысылалының чылыг четкилериниң бүдүрүлгелеринге хөй чылдарда ажылдаан, чылыг болгаш электри четкилериниң талазы-биле профессионал инженер Владимир Фунтиковту томуйлаан.
Владислав Ховалыг чаа томуйлаашкын дугайында дыңнадып тура, адырның ажыл-агыйын чурумчудуп, хөгжүдеринге Фунтуковтуң арга-дуржулгазы чугула херек деп демдеглээн.
Владимир Александрович Фунтиков 1976 чылдың март 28-те Кызыл хоорайга төрүттүнген. 1998 чылда Кызылдың автоорук техникумун «техник-механик» мергежилдиг дооскан. 2004 чылда Тываның күрүне университединге “агроном” дээди профессионал мергежилди чедип алган. 2010 чылда Красноярскиде Сибирьниң федералдыг университедин доозуп, чылыг болгаш чырык станцияларының инженери дипломну алган.
Күш-ажылчы базымын 2004 чылда «Тываэнерго» ААН-ның чолаачызы бооп эгелээн. 2004 чылдың июльда «Чылыг четкилери» ТР КУБ-туң участок начальнигинче шилчээн. 2012 чылдың ноябрь 30-де «Хоорайның чылыг четкилери» МУБ-туң директорунга томуйлаткан. 2013 чылдың март 27-де хоорай мэриниң амыдырал-хандырылга талазы-биле бирги оралакчызының хүлээлгезин күүседир кылдыр томуйлаткан. Сөөлгү чылдарда Фунтиков "Теплосеть плюс" КХН-ни удуртуп турган.
Владислав Ховалыг бүгү республикага одалга сезонун эки эрттирери - бирги ээлчегниң айтырыы ол деп, чаа сайытка айыткан.
ТР-ниң Чазааның даргазының оралакчызы албан-хүлээлгени күүседип турар А.В. Брокерт одалга-энергетика комплекизин удуртур.