Тываның Чөөн-Хемчик, Бии-Хем кожууннар база найысылал Кызыл биче хоорайларга база төөгүлүг суурларга таарымчалыг хоорай хүрээлелин хевирлээр төлевилелдер конкурузунга киржир

07.09.2022 Россияның Тудуг яамызы биче хоорайларга база төөгүлүг суурларга таарымчалыг хоорай хүрээлелин хевирлээр дээн эки дирткен төлевилелдерниң бүгү-росийжи мөөрейин база катап эрттирер дээни билдине берген. Конкурсче чагыгларны 2022 чылдың ноябрь 1-ге чедир хүлээр. Ук конкурска Тывадан Чөөн-Хемчик, Бии-Хем кожууннар база Кызыл хоорай киржир. Муниципалитеттер чагыргалары конкурс документилерин белеткеп эгелээн.
Тывага бир дугаар көжүп келген орустар парыгын Туран хоорайга тудар төлевилел эрткен чылын бүгү-российжи конкурска тиилээн, ам бо хонуктарда ажылдар ында кидин-түлүк. «Сылдыс» КХН тудуг организациязы ат салганы график езугаар ажылдарны 65 хуу чедир кылып алганын, республиканың Тудуг яамызы дыңнаткан.
Төлевилелди боттандырары 51,5 млн рубль деп, баштайгы дээрезинде санаан. Ындыг болзажок, тудуг материалдарының өртээ өзүп, ажылдың хемчээли улгатканындан, регионнуң тудуг яамызы федералдыг яамыдан немелде акшаландырыышкын дилээн бижикти киирген. Россияның Тудуг яамызы республиканың дилээн хандырып, немей 25 млн рубльди үндүрген. Бир дугаар көжүп келген орус хамаатыларга тураскааткан Туран хоорайда паркты тударынга ам 76,5 млн рубль үнери ол.
Төлевилелди бо чылдың ноябрьда тудуп доозар ужурлуг. Тус чер чагыргазының санап турары-биле алырга, Туранда чаагайжыттынган паркка чылда 9 муң хире кижи дыштаныр.
2022 чылда бүгү-российжи конкурстуң түңнели-биле, 20 муң чедир чурттакчылыг бичии хоорайлар номинацияга Шагаан-Арыг хоорайда “Азия төвүнде көшкүн чоннарның парыгы” төлевилел тиилээн. Конкурстуң негелдези езугаар бо төлевилелдиң боттаныышкынынче 70 млн рубльди тускайлап берген. Россияның Тудуг яамызы төлевилелди боттандырар дугайында чөпшээрелди 2022 чылдың төнчүзүнге чедир республикаже чорудуп бээр.