Россияның дөрт регионундан база Киргизиядан командалар Тываның Баштыңының Кубогу дээш ойнап турар

07.09.2022 «Субедей» спорт комплекизинде Тыва Республиканың Баштыңының кубогу дээш эр командалар аразынга мини-футболга маргылдаалар эгелээн. Чурттуң дөрт регионундан база Кыргыз Республикадан спортчулар маргылдаага киржир дээш Кызылда чедип келген. Губернатор Владислав Ховалыг база «Тыва Республиканың мини-футбол лигазы» регионнуң хөй-ниити организациязының директору Аян Соян бо чазын ужуражып тура, мындыг маргылдааны эрттирерин дугурушкан. Республикага спорттуң бо хевирин сайзырадырын чугаалажып тура, маргылдаа ол сорулганы чедип алырынга идигни бээрин демдеглээн.
Сентябрьның 9-ка чедир уламчылаар маргылдааның ажыдыышкыны дүүн болуп эрткен. 12 команда ойнаары-биле бүрүткеткен. Маргылдааны Тыва Республиканың регионда мини-футбол лигазы организастаан.
Маргылдаага Кыргыз Республиканы «Киргизия» команда төлээлээр. Иркутск облазындан «ИрАэро» авиакомпанияның командазы маргылдаага ойнаар дээш чедип келген. Красноярск край дээш «Лев» футбол клувунуң чыынды командазы ойнаар. А кожа-хелбээ Хакасия маргылдаада ийи команданы салган - "Иренек" база "ЛигаПро" футбол клубтары. Тыва Республика эң хөй – чеди команданы киириштирер.
Тываның спорт сайыды Субудай Монгуш маргылдааны байырлыы-биле ажыдып тура, киржикчилерге шынчы оюннарны, шииткекчилерге чөптүг шииткелди, улуг хей-аътты күзээн.
I, II база III черлер ээлээн тиилекчи командалар 300, 200 база 100 муң рубльдиң шаңналдарын алыр. Оюннарның түңнелинде маргылдааның тулган вратарын, тулган халдакчызын база эң эки ойнакчыны илередир.
Владислав Ховалыг биле Аян Соян ужуражылга үезинде, уруглар аразынга база мындыг оюннарны эрттирерин дугурушкан. Уруглар маргылдаазын бо чылдың ноябрь-декабрьда организастаар.