Тыва «Паутина» системада каттыжып кирген

06.09.2022 Тываның найысылалы Кызыл хоорайда “Ээремчик дузаа” - «Паутина» система ажылдап эгелээн. Ол дээрге регионнуң чаңгыс аай четкизин база чурум үрээшкиннерин чурук-видеога демдеглеп тырттырар идегелдиг инфраструктураны каттыштырган программа-аппараттыг комплекс болур. Ол чүгле оруктарда камераларны эвес, а оран-саваларда, бажыңнарда, подъездилерде тургускан камераларны база хаара тудар.

Төлевилелдиң киржикчизи  ТР-ниң чурагайлыг хөгжүлде яамызының медээзи-биле алырга, «Паутина» деп чаа программа хандырылгазы эң улуг система болур. ИХЯ, ОШААЧКИ база видеохайгааралдыг өске-даа системалар структуразының ажылын ол элээн делгемчиткен. Чижээ, полицейжилер «Паутина» таварыштыр, оорлап мунган база орук озал-ондаан болдургаш дезе берген автомашиналарны дилээринге, а чолаачыларга – шын эвес торгаалдарны хомудаарынга дузалыг.

Бо хүнде Кызыл хоорай девискээринде 25 видеокомплексти «Паутинада» кожуп, ажылдаткан. Чыл төнчүзүнге чедир ам-даа 27-ни кожар. Ол системаны Цаган-Тологой база Хандагайты кызыгаар постуларынга база тургузар.

«Паутина» дузазы-биле чүгле оорлаан машиналарны дилээр эвес, а шуут дөмей кылдыр кылган автомобильдерни база илередип болур. Чижээ, Москвада шак ындыг машинаның чолаачызы дугаарын өскерткеш, Тывада буруу чок чолаачыже бодунуң торгаалдарын шилчидиптер турган. Видеобүрүткелдиң регион системазы биле медээлер баазазы аңгы турда, ону бузурукчулар  ажыглап турган. Ам ындыг таварылгаларны «Паутина» белени-биле тодарадыптыр.