Өвүрнүң ыраккы суурларынче дүрген дамчыыр Интернетти киирген

06.09.2022 Тываның Өвүр кожуунунуң ыраккы суурларын дүрген дамчыыр Интернетте кошкан. «МТС» компания Дус-Даг, Чаа-Суур база Ак-Чыраа суурларда 4G интернетти кииргенин дыңнаткан.
Ак-Чыраада дөрткү үе-чаданың мобильдиг харылзааpы бир дугаар келгени бо. Моол-биле кызыгаарда суур ооң мурнунда бажың роутери-биле ажылдаар фемтосотаны - эвээш күчүлүг 3G бичежек баазалыг станцияны ажыглап турган. Август төнчүзүнде Ак-Чыраада база Чаа-Суурда 4G-ниң бүрүн дериг-херекселин тургузупкан.
Дус-Даг суурнуң муң хире чурттакчызы дүрген дамчыыр Интернеттиң бүгү ажыын ажыглап эгелээн: секунда дургузунда смартфонче ажылдаар азы өөренир улуг хемчээлдиг чүүлдерни киирип, күрүне ачы-дузаларын ап, почтадан чоруткан азы кел чыдар чүүлдерин көрүп, эки шынарлыг киноларны көөр аргалыг апарган.
“Республиканың эвээш чурттакчылыг бичии суурларын 4G харылзаазы-биле хандырар төлевилелди уламчылап турар бис – деп, Тывада МТС директору Экер Хертек чугаалаан. - Мооң мурнунда Барыын-Хемчик кожууннуң Аяңгаты база Хөнделең, Чөөн-Хемчиктиг Элдиг-Хем база Чеди-Хөлдүң Хөлчүк суурларының чурттакчыларында мобильдиг харылзаа база дүрген Интернетти киирген. Олар “улуг чер”-биле харылзаалыг апарып, чурагай делегейиниң шупту ажыын ажыглап эгелээн. Мобильдиг харылзаа чараш бойдус-чурумалдыг, культурлуг болгаш төөгүлүг өнчү-салгалдыг Тывавыстың мындыг онзагай булуңнарының турисчи курлавырын ажыдарынга улуг ужур-дузалыг”.