Тывада «Арыг хоорай. Арыг суур» чаа губернатор төлевилели эгелээн

06.09.2022 Республика Баштыңы Владислав Ховалыгның даалгазы-биле Тывада «Арыг хоорай. Арыг суур» деп чаа губернатор төлевилели эгелээн.
Төлевилел чорудуу-биле республиканың муниципалдыг тургузуглар ортузунга чаагайжыдылга, ногаажыдылга база арыг-силиг талазы-биле чылдың-на республика база муниципалдыг конкурстарны эрттирери, арыг-силиг база чурум дүрүмнерин сагаанының талазы-биле рейд, хыналда база профилактика хемчеглерин күштелдирери, арыг-силигни хандырарынга 12 санныг тускай техниканы садары планнаттынган.
Чурттакчылыг суурларны чаагайжыдар база ногаажыдар ажылдарже, субботниктерже республиканың чонун, аныяк салгалды хөйү-биле хаара тудары көрдүнген.
Республика чурттакчылары бодунуң хоорайы базы суурунга арыг-силигни база чурумну тудары бодунуң сонуургалында апаарындан ол харыысалгалыг болур деп, төлевилелдиң ажылдакчылары санап турар.
Оон аңгыда, төлевилел Тываның найысылалы Кызылдың база кожуун төптериниң турисчи сорунзазын күштелдирип, оларны арыг, чараш, айыыл чок болдурарын хандырар.