Шахтерниң хүнү-биле Тывада хөмүр-даш үлетпүрүнүң ажылдакчыларын шаңнаан

26.08.2022 Тываның Чазаанга, Шахтер хүнүнүң бүдүүзүнде, республиканың хөмүр-даш үлетпүрүнүң ажылдакчыларын байырлыы-биле демдеглээн. Тываның Баштыңының өмүнээзинден регион Чазааның даргазының оралакчызы хүлээлгени күүседип турар – одалга болгаш энергетика сайыды Мерген Дагба база ТР-ниң Дээди Хуралының (парламент) даргазы Каң-оол Даваа даг ажылының шалыпчыларынга байырны чедирген.
«Хөмүр-даш үлетпүрү одалга-энергетика комплекизиниң хоочун боорда, мурнады хөгжүдер адырларның бирээзи болур. А шахтернуң күш-ажылы эр сорук, ханы туруш херек, эштеринге кажан-даа дуза кадып келиринге белен, ниитилелде хүндүткелдиг кижилерниң мергежили» - деп, Мерген Дагба байыр чедириишкининде демдеглээн.
«Тываның даг-руда компаниязы» КХН-ниң ажылдакчыларынга күрүне шаңналдарын тывыскан.
Ак сеткилдиг ажылы дээш Тыва Республиканың Баштыңының Хүндүлел бижиин экскаватор башкарыкчызының дузалакчызы Валентин Волченкога тывыскан. Чадаананың автотранспорт участогунуң БелАЗ чолаачызы Март-оол Ховалыг, чер өрүмнээр дериг машинизиниң дузалакчызы Арбын-оол Шожапка, бульдозер машинизи Алексей Романенкога, электромеханик Онмас Кара-Салга, компанияның техниктиг директору Андрей Видутога Тыва Республиканың Баштыңының Өөрүп четтириишкин бижиктерин берген.
Чадаана участогунуң септелге-механика участогунуң кран башкарыкчызы Аляна Сат, даг ажылдарының участогунда өрүмнээр дериг машинизи Эдуард Донгак, БелАЗ чолаачызы Виктор Маслов республиканың одалга болгаш энергетика яамызының Хүндүлел бижиинга төлептиг болган. Яамының өөрүп четтириишкиннерин Чадаана автотранспорт участогунуң бульдозер мунукчузу Бараа Сатка, даг ажылдарының участогунда ЭКГ-5А экскаватор башкарыкчызының дузулакчызы Евгений Медовиковка, септелге-эдилге участогунуң мастери Евгенийка Гурковка тудускан.